Medalisti i artë olimpik italian, Thomas Ceccon u pa duke fjetur brenda një parku në Fshatin Olimpik në “Paris 2024”.
Ngasësi saudit i biçikletave, Husein Alireza e përdori rrjetin social Instagram për ta shpërndarë foton e Ceccon duke e bërë një sy gjumë në një peshqir të bardhë nën një pemë të shtunën.
“Sot pushim, nesër ‘pushtim’”, shkroi ai në story derisa e bëri “tag” lokacionin në Fshatin Olimpik.
Vlen të përmendet se notari italian, Thomas Ceccon e fitoi të artën në 100 metra shpinë dhe të bronztën në 4×100 metra në stilin e lirë.
Më herët, Ceccon ishte ankuar publikisht rreth akomodimit në Fshatin Olimpik në “Paris 2024”.
“Nuk ka klimë në fshat, është nxehtë, ushqimi është i keq”, ka thënë Ceccon.
“Shumë atletë lëvizën për këtë arsye, nuk është një alibi apo një justifikim, është një realitet i asaj që ndodh e që jo gjithkush e di”, ka shtuar ai.
