Twitch planifikon të ofrojë këtë vit mjete financiare si abonimet dhe Bits për të gjithë ‘streamerët’, ka konfirmuar drejtori i kësaj platforme, Dan Clancy.
Më parë, ‘monetizimi’ i transmetimeve në Twitch kërkonte arritjen e statusit “Affiliate” në këtë platformë, por kjo do të ndryshojë.
Abonimet e përdoruesve në një kanal Twitch dhe mbështetja përmes Bits, monedhës digjitale të Twitch-it, janë dy mënyrat kryesore që një ‘streamer’ mesatar të fitojë para nga transmetimet e tij, përveç të ardhurave pasive nga reklamat ose sponsorët. Aktualisht, çdo abonim i ri ndahet në një raport 50/50 pas përpunimit të tarifave dhe taksave, ndërsa çdo Bit i marrë gjatë një transmetimi vlen 0.01 dollarë.
Hapja e abonimeve dhe Bits për “shumicën e streamerëve, që nga dita e parë” synon ta bëjë streaming-un në Twitch më tërheqës për ata që shqetësohen për procesin e gjatë të arritjes së statusit Affiliate ose Partner.
Arritja e këtyre statusit në Twitch kërkon një numër të caktuar ndjekësish, orësh transmetimi dhe kritere të tjera. Duke lejuar disa mjete monetizimi për të gjithë përdoruesit, progresi në Twitch mund të bëhet më i fokusuar në qasjen ndaj mjeteve sesa në fitimin e parave. ‘Streamerët’ e rinj duhet të kenë parasysh se duhet të grumbullojnë të paktën 50 dollarë për të tërhequr fitimet e tyre.
Përveç këtyre ndryshimeve, Clancy njoftoi se Twitch do të prezantojë më shumë mënyra që ‘streamerët’ të fitojnë para së bashku. Kjo përfshin mjete të reja për redaktimin dhe krijimin e videove nga transmetimet, si dhe mjete të zgjeruara për moderimin në pajisjet mobile.
Twitch ka rishikuar qasjen e tij ndaj moderimit dhe shkeljeve të rregullave në muajt e fundit. Më herët këtë muaj, kompania ndryshoi mënyrën e trajtimit të shkeljeve të rregullave të komunitetit, duke lejuar që disa prej tyre të “skadojnë” pas një periudhe të caktuar kohe.
