Hipertensioni dhe problemet kardiake shfaqen shpesh gjatë verës tek të moshuarit.
Mjekja, Inva Sulejmani, që shërben në qendrën verore në plazhin e Darzezës këshillon pushuesit që të bëjnë kujdes nga i nxehti dhe zhytja në ujë në rastet kur frekuentojnë plazhet.
"Problem tjetër i madh mbetet goditja nga nxehtësia sidomos moshat e mëdha të mos ekspozohen në rrezet e diellit nga ora 12 në 4 pasdite. Problemet e tjera që na shfaqen janë tensioni, hipertensioni dhe problemet kardiake. Nxehtësia ndikon shumë në pacientët kardiakë".
Sulejmani ka vërejtur se në këtë zonë janë shtuar rastet e pacientëve që pickohen nga peshku harabel dhe nga gaforrja.
"Problematika të mëdha që kemi pasur, sidomos këtë sezon veror, janë në rastet e fëmijëve të vegjël pickimi nga peshku harabel, pickimet e gaforreve."
Kujdesi në këto ditë duhet të jetë maksimal, e po aq vëmendje qytetarët duhet të kenë edhe për tu ruajtur nga temperaturat e larta.
Në oraret 12:00 me 16:00 duhet shmangur dielli.
Nga nisja e sezonit deri tani, në Darzezë ka humbur jetën një pushues e dy të tjerë e kanë rrezikuar.
