Receta e sotme nga Erida Kabashi, përveçse është shumë e shijshme, është edhe e thjeshtë për t'u gatuar, pasi mund të përdorni ato perime që ju kanë mbetur në frigorifer. Si të përgatisni një lazanja me perime shumë thjeshtë? Mënyrën e përgatitjes e keni të detajuar më poshtë.
Për 4-5 persona ju duhen:
500 gr petë lazanja (shikoni paketimin nese duhet t’i zieni më parë apo s’kanë nevojë)
Beshamel
1,2-1,3 litër qumësht
120 gr miell
120 gr gjalpë
Arrë moskat
Kripë
Përgatitja e gjellës me perime, me çfarë të keni në frigorifer. Në këtë rast:
Qepë, kungull, karotë, patëllxhan, gjethe brokoli, spec, domate dhe djathë kaçkavall të grirë.
Mënyra e përgatitjes:
Fillimisht kaurdisim të gjitha perimet për disa minuta. Nisim me qepën, më pas shtojmë të tjerat një nga një, duke bërë një gjellë me perime. I hedhim kripë, piper dhe erëza të tjera sipas dëshirës.
Më pas fillojmë shtrimin në tavë.
Hedhim pak beshamel në fund të tavës. Shtrojmë një shtresë peta, i hedhim pak gjellë me perime, beshamel dhe djathë të grirë. Veprojmë kështu për të gjitha shtresat. Më pas e pjekim në furrë për 30-35 minuta në 200 gradë. Në këtë mënyrë nuk hedhim asgjë poshtë, por edhe shijojmë një recetë shumë të shijshme.
Beshamelin, nëse doni ta përgatisni vetë. Receta sipas Eridës:
Në një tenxhere hedhim gjalpin, më pas miellin, i perziejmë gjithë kohën me rrahësin e vezëve që të mos formojë kokrriza. Fillojmë shtojmë pak nga pak qumështin dhe e lemë sa të trashet pak e bëhet si krem i hollë. Në fund, i hedhim kripë dhe pak arrë moskat dhe e kemi gati.
