Policia e Vlorës ka arritur të parandalojë vjedhjen e një subjekti në lagjen “24 Maji”.
Efektivët pasi kanë vënë re lëvizje të dyshimta nga dy persona kanë ndërhyrë duke arrestuar në flagrancë dy persona që po tentonin të vidhnin.
Në pranga kanë rënë dy të rinj, përkatësisht një 36 dhe 31-vjeç. Të dy këta persona kanë qenë me precedentë kriminal për vjedhje.
Nga provat e siguruara u vërtetua se më 25 janar të këtij viti kanë vjedhur produkte në një lokal në lagjen “10 Korriku”, ndërsa më 1 janar të po këtij viti kanë tentuar të vjedhin materiale elektrike në një objekt ndërtimi.
Njoftimi:
Ndërhyrja e menjëhershme e shërbimeve të Patrullës së Përgjithshme parandalon vjedhjen në një subjekt tregtar. Vihen në pranga 2 shtetas, me precedent kriminal për vjedhje.
Zbardhen dhe dokumentohen 1 rast i vjedhjes dhe 1 rast i tentativës për vjedhje, me autorë këta dy shtetas.
Gjatë kontrolleve të vazhdueshme për garantimin e sigurisë në territor, shërbimet e Patrullës së Përgjithshme të Komisariatit të Policisë Vlorë kanë konstatuar lëvizje të dyshimta pranë një subjekti tregtar, në lagjen “24 Maji”, dhe kanë ndërhyrë menjëherë, duke kapur dhe arrestuar në flagrancë dy shtetas që po tentonin të vidhnin, konkretisht:
E. H., 36 vjeç, dhe E. K., 31 vjeç, të dy banues në Vlorë, me precedent kriminal në fushën e vjedhjes.
Nga veprimet e mëtejshme hetimore të kryera nga specialistët për Hetimin e Krimeve të Komisariatit të Policisë Vlorë, bazuar në provat e siguruara për disa raste të tjera vjedhjesh në qytet, u dokumentua se këta shtetas:
Më datë 25.01.2025, kanë vjedhur produkte të ndryshme në një lokal në lagjen “10 Korriku”;
Më datë 02.01.2025, kanë tentuar të vjedhin materiale elektrike në një objekt në ndërtim në lagjen “1 Maji”.
Në cilësinë e provës materiale u sekuestruan disa sende që dyshohet se janë përdorur nga dy autorët, për kryerjen e vjedhjeve.
Vijon puna për zbardhjen dhe dokumentimin e rasteve të tjera të vjedhjeve që mund të jenë kryer nga këta shtetas.
Materialet procedurale i kaluan Prokurorisë, për veprime të mëtejshme.
