Delegacioni i Federatës së Volejbollit të Kosovës po merr pjesë në Kongresin e 39-të Zgjedhor të Federatës Botërore të Volejbollit (FIVB), që po mbahet në Porto, Portugali.
“Ky kongres, që zhvillohet në datat 15-16 nëntor, përfaqëson një ngjarje të rëndësishme për të gjitha federatat anëtare të FIVB-së, duke përfshirë edhe Kosovën. Federata e Volejbollit e Kosovës po përfaqësohet në këtë ngjarje ndërkombëtare nga presidenti Bahri Gjinovci dhe sekretari i përgjithshëm Valon Nikqi.
Kongresi do të fokusohet në një sërë pikash të rëndësishme për zhvillimin dhe drejtimin e mëtejshëm të volejbollit në nivel botëror.
Një nga çështjet më të rëndësishme në rendin e ditës është procesi zgjedhor për postin e presidentit të ri të FIVB-së, i cili do të udhëheqë organizatën për katër vitet e ardhshme.
Zgjedhja e drejtuesit të ri do të ndikojë në orientimin dhe politikat strategjike të FIVB-së, duke përfshirë mbështetjen për federatat anëtare dhe promovimin e sportit të volejbollit në nivel global.
Pas përfundimit të Kongresit Zgjedhor, më 17 nëntor do të mbahet Samiti i Volejbollit, ku përfaqësuesit do të kenë mundësi të diskutojnë tema që synojnë përparimin e volejbollit dhe beach volley-it në të gjitha nivelet. Në samit pritet të diskutohen strategji për rritjen e kapaciteteve të federatave, promovimin e gjerë të volejbollit në komunitete të ndryshme, si dhe përmirësimin e standardeve dhe infrastrukturës në këtë sport.
Pjesëmarrja e Federatës së Volejbollit të Kosovës në këto dy ngjarje të rëndësishme reflekton përkushtimin e saj për të qenë e pranishme dhe aktive në zhvillimet ndërkombëtare të volejbollit, duke synuar që përvoja dhe njohuritë e përfituara të kontribuojnë në ngritjen e këtij sporti në Kosovë”, njofton FVK.
