Në arenën prestigjioze të CEV Cup, Kosova vazhdon të përfaqësohet me dinjitet përmes profesionistëve të saj.
Valon Nikqi ishte njeriu kryesor që iu besua roli i Supervisor-it në ndeshjen e kthimit mes ekipeve Pafiakos (Qipro) dhe Draisma Dynamo Apeldoorn (Holandë), zhvilluar në qytetin bregdetar të Phaphos-it.
“Kjo ndeshje dramatike përfundoi me triumfin e ekipit vendas, Pafiakos, me rezultat 3-1, duke përmbysur humbjen në ndeshjen e parë (3-2) dhe siguruar kalimin në fazën tjetër të garës.
Ndeshja u drejtua nga gjyqtarët polakë Maciejewski Maciej dhe Apanowicz Daniel, ndërsa Nikqi mbikëqyri me profesionalizëm të gjitha aspektet organizative dhe sportive të saj.
Pjesëmarrja e Valon Nikqit në një ngjarje të tillë përbën një hap të rëndësishëm për volejbollin kosovar, duke dëshmuar edhe një herë progresin e jashtëzakonshëm të Federatës së Volejbollit të Kosovës në arenën ndërkombëtare.
Roli i tij si Supervisor është jo vetëm një arritje personale, por një mesazh i qartë për cilësinë dhe përkushtimin që sportistët dhe zyrtarët kosovarë sjellin në kompeticione të tilla prestigjioze.
KY përfaqësim i lartë institucional rrit prestigjin e volejbollit kosovar dhe shërben motivim për kuadrot tjera nga volejbolli kosovar, që të ndjekin rrugën drejt suksesit ndërkombëtar”, njofton FVK.
