Studenti ka fituar derbin e ekipeve shqiptare kundër Skënderbeut në Grupin B të Ligës Gjergj Kastrioti në volejbollin e meshkujve, takim i fundit në grup për të dyja skuadrat.
Kryeqytetasit triumfuan dje me rezultatin 3-2 në “Asllan Rusi” pas një sfide me shumë rivalitet që zgjati 2 orë. Korçarët vinin në këtë përballje me kualifikimin dhe vendin e parë “në xhep”, ndërsa ekipit studentor i duhej një fitore 3-0 ose 3-1 për të siguruar kalimin në gjysmëfinale.
Skënderbeu e filloi mirë, duke marrë setin e parë në shifrat 22-25, por studentorët u kundërpërgjigjën në të dytin me rezultatin e thellë 25-16. Miqtë rimorën epërsinë në sete, teksa fituan fraksionin e tretë 20-25, por skuadra e drejtuar nga Kestrin Batalli nuk u dorëzua dhe arriti të realizonte përmbysje, duke fituar fillimisht setin e katërt 25-22, e më pas triumfoi në setin final në shifrat 15-13.
Megjithatë kjo mund të quhet një fitore si e Pirros për Studentin, pasi kryeqytetasit, të cilët e kishin në dorën e tyre kualifikimin, tashmë duhet të presin takimin Ferizaj-Peja për të mësuar fatet e tyre në eventin mbarëkombëtar. Në rast fitoreje 3-pikëshe të Ferizajt, Studenti eliminohet nga Liga Gjergj Kastrioti.
