Në Cyrih të Zvicrës, ndërroi jetë në moshën 68 vjeçare, veprimtari i çështjes kombëtare dhe aktivisti i devotshëm i komunitetit shqiptar në Zvicer Kristë Coli
Lajmin për vdekjen e të ndjerit e ka dhënë familja e tij
Duhet rikujtuar se ndër aktivitetet e shumta në shërbim të çështjes shqiptare të të ndjerit Kristë Coli, në bashkë-organizim edhe me veprimtarin Ahmet Aasanin, për herë të parë më 5 dhe 6 shtator 1998, në qytetin historik Arbon të Zvicrës, u mbajt simpoziumi i parë shkencor për krishterimin ndër shqiptarë. "2000 vjet krishterim te shqiptarët" do të ishte titulli i ngjarjes, e cila qëllimisht u organizua në shënimin e njëvjetorit të vdekjes së Nënës Terezë.
Materialet e këtij simpoziumi, po ashtu me iniciativë dhe kontribut të të ndjerit Kristë Coli dhe veprimtarit Ahmet Hasani, u përmblodhën në një libër që u botua dhe u promovua vitin e kaluar me titull "2000 vjet krishterim te shqiptarët", libër që dëshmon autoktoninë dhe identitetin evropian të shqiptarëve. I ndjeri Kristë Coli njihej edhe si humanist dhe kontribuues i madh në shumë projekte me karakter kombëtar. (n.h.)
