LIVE: Kuvendi ​miraton në parim Projektligjn për Prokurorin e shtetit

Kryetari i AAK-së, Ramush Haradinaj, ka thënë se Qeveria e Kosovës duhet t’ia bëjë një analizë planit në veri të vendit për çështjen e targave dhe se nëse s’po ec duhet të ndërrojë atë.

“S’është marre me i bë analizë planit. Pse qeveria vetëhidhërohet? Pse lyp faj te ne tjerët kur i ka përgjegjësitë? Bëje një analizë, nëse plani nuk shkon në drejtimin e duhur nuk është marre, nuk po e bëni këtë se jeni të dobët, por se plani s’po jep rezultat. Gjithë njerëzit racionalë veprojnë kështu, edhe qeveritë e superfuqive”, tha Haradinaj nga foltorja. 

Ai tha se nëse Qeveria e gjen që vendimi për targat ka efekte dhe po jep sukses, atëherë “le të na tregojë”.

“Cila është kundërvlera që i ka thënë jo kërkesës amerikane?”.

Deputeti nga radhët e PDK’së, Abelard Tahiri, ka zbuluar se është kërcënuar me grua dhe fëmijë nga një person, për siç ka thënë, debatin e partisë në pushtet për punën e armës me shurdhues.

Tahiri ka thënë se për këtë e ka edhe konfirmimin e Policisë.

Këtë deklaratë, Tahiri e dha pasi zëvendëskryeministri Besnik Bislimi dhe Ministri Hekuran Murati, ia përmendën punën e armës me shurdhues.

“Për punën e shurdhuesve, nuk e kam thanë asnjëherë më herët, duke i përmend ju, unë e kam marrë një kërcënim që e kam denoncuar në Polici, kërcënojnë në grua dhe fëmijë”, ka thënë Tahiri.

Sipas Tahirit, personi që e ka kërcënuar është në vuajtje të dënimit në Podgoricë, për organizimin e një vrasje.

“Policia vjen me një raport, ku thotë e kemi identifikuar personin, i cili ju ka kërcënu. Është në vuajtje të dënimit në Podgoricë, për organizimin e një vrasje, si rezultat i debatit për shurdhues. Pra është një vrasës në vuajtje të dënimit në Podgoricë, më shkruan mua nga burgu pikërisht për punën e shurdhuesve, me debatin që e beni ju. Janë armë që janë ble për sigurimin e kryeministrit të Republikës së Kosovës në atë kohë, e që s’ka lidhje me mua. Prandaj ju me këtë retorikë me të cilën na i kërcënoni edhe gratë dhe fëmijët në shtëpi, nuk kemi me ju toleru. Shikoni, kontaktone Policinë dhe e shihni. Pra e kam konfirmimin e Policisë që personi që më shkruan për shurdhues nga burgu në Podgoricë, është një njëri i dënum për organizimin e një vrasje në Podgoricë. Ju me këtë retorikë, keni më u përplas keq me neve”, ka deklaruar Tahiri.

Diskutimi për situatën në veri të Kosovës është përcjellur me përplasje fjalësh mes opozitës dhe përfaqësuesve të qeverisë.

Zëvendëskryeministri i Kosovës, Besnik Bislimi ka thënë se është mirë që prokuroria të merret me shefin e deputetëve të Partisë Demokratike të Kosovës Abelard Tahiri, për të cilin ka thënë se ‘në stilin e banditit’ i është afruar të ulësja.

Bislimi: Ableard Tahiri erdhi të ulësja ime në stilin e banditit

“Ish ministri i Drejtësisë dhe deputeti Abelard Tahiri nga kjo foltore nxori një sërë akuzash për minsitren Haxhiu, ndërkaq pasi u mbyll mikrofoni në stilin e një banditi që vendosë shurdhuesin e armës së tij u kthye nga unë dhe shprehu një sërë kërcënimesh të cilat pastaj i shoqëroi me të shara dhe fyerje nga ulësja e tij dhe mendoj që do të ishte shumë mirë që prokuroria të merret me këtë rast”, ka thënë Bilsmi.

Ndërsa Tahiri ka thënë se anëtarët e qeverisë janë në siklet andaj po flasin të pavërteta.

Tahiri: Qeveria është në siklet, po flet të pavërteta

“Vërtetë është një çoroditje e kësaj qeverie, nuk e di të nderuar kolegë deputetë a jeni duke e parë, sjelljen e tij, sjelljen e saj(Albulena Haxhiut), këta e kanë një siklet jashtëzakonisht të madh, këta e kanë një problem tepër të madh, këta janë në një siklet të cilët as vendi vend nuk po i zë, ky edhe flet akzua të pabaza, del në foltore flet të pavërteta, ky vërtetë është në gjendje të rëndë edhe psikike, ky është në gjendje të rëndë, andaj ne i kërkojmë fokus, angazhim, punë, kësaj qeverie në krye të detyrave të saj”, ka thënë Tahiri.

Thirrje për të mos përdorur gjuhë joparlamentare ka bërë nënkryetarja e Kuvendit, Saranda Bogujevci e cila është duke e drejtuar seancën.

Bogujevci: Gjuha joparlamentare e përdorur sot është e papranueshme

“Është e papranueshme në pikën ku kemi mbërri sot dhe gjuha që është përdorë edhe jashtë mikrofonit, i lus deputetët por edhe anëtarët e qeverisë që të frenoheni nga fjalët joparlamentare, nuk është në rregull”, ka thënë ajo. 

Deputeti i PDK-së, Abelard Tahiri ka kërkuar nga ministrja e Drejtësisë, Albulena Haxhiu që të dorëhiqet pasi është e sanksionuar nga ShBA-të.

Ai ka thënë që është turp që ministrja Haxhiu ta mbajë akoma këtë pozitë edhe për shtetin e Kosovës.

“Faleminderit ministre e sanksionuar nga ShBA nuk e si a ka më të keqe se me u sanksionu nga ShBA-të. Ne e kemi larguar Veselinoviqin dhe Radiojqiçin, por ju të sanksionuarit po e ktheni krimin në veri. Unë me qenë në situatën tanë kisha dhënë dorëheqje, sepse me u sanksionu nga ShBA-të e me vazhdu punën si ministre e Drejtësisë është marre”, është shprehur Tahiri.

Ministrja e Drejtësisë, Albulena Haxhiu, dje ka thënë se bashkë me ambasadorin amerikan, Jeffrey Hovenier, e kanë konsideruar se duhet ta shtyjnë vizitën e saj për në SHBA për në dhjetor.

Ministri i Financave, Hekuran Murati ka thënë se ishte dëshmitar i kërcënimit të zëvendëskryeministrit Besnik Bislimi në Kuvendin e Kosovës të enjten.

Murati, para deputetëve, tha se kërcënuesi është shefi i Grupit Parlamentar të Partisë Demokratike të Kosovës, Abelard Tahiri.

Ai i bëri thirrje Prokurorisë së Shtetit që ta trajtojë rastin.

“Pak minuta më parë isha edhe unë dëshmitar, pas mbylljes së mikrofonit, nga ulësja e tij, Abelard Thairi kërcënoi dhe shau zëvendëskryeministrin Besnik Bislimi. Ftoj prokurorinë që të trajtojë kërcënimin e një personi që ka mbajtur armë shurdhuese për shumë vite”, tha ai.

Shefi i grupit parlamentar të Partisë Demokratike të Kosovës, Abelard Tahiri ka kërkuar nga Qeveria e Kosovës që të mos ta vë në pikëpyetje bashkëpunimi 20 vjeçar me Shtetet Bashkuara të Amerikës.

Sipas tij, opozita nuk po kërkon zgjedhje, por zgjidhje të problemit të shkaktuar tash e disa ditë në veri.

Tahiri: Bashkëpunimi me SHBA-të nuk duhet të vihet në pikëpyetje

“Prandaj, iu kërkojmë vigjilencë, angazhim, përkushtim që të vazhdoj puna e Policisë së Kosovës në veri të vendit, që të vazhdoj puna e Prokurorit të Shtetit në veri të vendit, që të vazhdoj puna e gjyqtarëve në veri të vendit. Kordinimi me SHBA është një prej proceseve që i ka dhënë më së shumti fryte dhe fuqizimin e shtetit të Kosovës, nuk na duhet konfrontim me SHBA. Si rezultat i një angazhimi të tyre kemi arritur me fuqizua shtetin tonë, kemi arritur njohjet tona....gjithë këtë histori të përbashkët 20 vjeçare me SHBA nuk duhet a vënë në pikëpyetje, si opozitë nuk kërkojmë zgjedhje, si opozitë kërkojmë zgjidhje të problemit të cilin e keni shkaktuar tash e disa ditë në veri të Kosovës. Si opozitë nuk do të tolerojmë në asnjë rrethanë dhe asnjë moment që të tërhiqeni nga ushtrimi i sovranitetit të qeverisë së Kosovës edhe në atë pjesë të vendit tonë. Sot duket qartë se ajo pjesë kontrollet nga një numër simbolik i Policëve, nuk funksionon gjyqësori, nuk funksionon prokuroria”, tha ai.

Ai shtoi se opozita mbështet Qeverinë për të ushtruar sovranitetin e saj në veri, por kërkoi që Qeveria të jetë përgjegjëse dhe të mos lejojë kthimin e strukturave paralele në këtë pjesë të vendit.

Tahiri: Si opozitë iu mbështesim që të vazhdojë puna e institucioneve në veri

“Ka qenë një angazhim i yni i përbashkët për largimin e strukturave paralele dhe strukturave të cilat financoheshin nga Beogradi, largimin e strukturave të cilat një kohë mbështeteshin nga Tadiq e më vonë nga Vuçiqi, kemi pamundësua funksionimin e kriminelëve që mbështeteshin nga politika serbe siç ishin Veselinoviq dhe Radoiqiq, njerëz të cilët pikërisht për shkak të sundimit të rendit dhe ligjit nuk mund të qëndrojnë në atë pjesë të Kosovës. Andaj, e nderuar Qeveri e Kosovës si opozitë iu mbështesim edhe sot e kësaj dite që të vazhdoni me funksionimin e punës së institucioneve që sapo i përmenda në atë pjesë të Kosovës. jeni përgjegjës për moslejimin e kthimit të gjendjes para korrikut të vitit 2011, jeni përgjegjës për mirëmbajtjen dhe ushtrimin e sovranitetit të Kosovës edhe në atë pjesë të vendit tonë. Jeni përgjegjës për mos lejimin e kthimit të strukturave paralele në atë pjesë të vendit tonë. Prandaj, ne do t’iu mbështesim deri në atë moment kur ju nuk do të heqni dorë nga ajo pjesë e territorit të Kosovës, të cilën me mund e sakrificë, me dialog, me politikë e angazhim tonin e kemi kthyer nën menaxhimin dhe udhëheqjen e institucioneve të Republikës së Kosovës”, theksoi ai.

Zëvendëskryeministri Besnik Bislimi ka dalë në foltoren e Kuvendit dhe tha se shefi i GP të PDK-së, Abelard Tahiri, e ka sharë dhe fyer pasi iu ndal mikrofoni.

“Deputeti Abelard Tahiri nxori një sërë akuzash për ministren Haxhiu, ndërkaq pasi u mbyll mikrofoni në stilin e një banditi që i vendos shurdhuesin armës së tij u kthye kah unë dhe shprehu një sërë kërcënimesh, të cilat pastaj i shoqëroi me sharje dhe fyerje nga ulësja e tij. Do të doja që Prokuroria të merret me këtë rast”, tha Bislimi në foltore.

Derisa kryesuesja e Kuvendit, Saranda Bogujevci, kërkoi që të kenë kujdes me gjuhën edhe nga ana e Qeverisë edhe nga ana e deputetëve.

Tahiri më pas u kundërpërgjigj duke thënë se Bislimi është në “gjendje të rëndë” dhe se në foltore po flet akuza të pabaza.

Kryetari i AAK-së, Ramush Haradinaj në seancën e sotme të Kuvendit të Kosovës ka përmendur katër veprime që sipas tij duhet të ndërmerr Qeveria e Kosovës për të dalë nga situata në të cilën ndodhet vendi.

Haradinaj ka thënë se veprimi i parë duhet të jetë pranimi i kërkesës për shtyrje të vendimit për targa deri në marrëveshje.

“Veprimi i dytë që duhet ta marrim së bashku është dialogu me serbët lokalë të Kosovës, një dialog intensiv për ti kthyer ata në institucione. Veprimi i tretë është dialogu i qeverisë me opozitën dhe veprimi i katërt është një takim disa ditor në Amerikë deri në përmbylljen e marrëveshjes finale Kosovë-Serbi”.

Haradinaj shtoi se ikja nga këto veprime, përpjekja që përmes turizmit diplomatik dhe deklarimet rrethanore nuk e ndihmojnë gjendjen.

“Në fund nuk do të jetë faji vetëm i pozitës, në fund të gjithë do të bartim peshën e pasojave”. 

Shefi i Grupit Parlamentar të Lidhjes Demokratike të Kosovës, Arben Gashi i ka kërkuar sot kryesueses së seancës së sotme të Kuvendit të Kosovës, Saranda Bogujevcit, që ta largojë nga salla ministren e Drejtësisë, Albulena Haxhiu.

Gashi është ankuar për zhurmë të krijuar nga Haxhiu derisa ai po mbante fjalim në emër të Grupit Parlamentar.

“Kryesuese, mundësisht i bën thirrje Albulenës të mos bëjë zhurmë nga prapa se jam duke mbajt fjalim. Do duhej që për gjuhën që e përdor prapa, kryesuesja e kuvendit t’ia tërheq vërejtjen dhe ta largojë nga salla”, ka thënë Gashi.

Ai ka thënë se kryeministri Albin Kurti, “i nxitur nga egoja” po rrezikon institucionet dhe shtetin e Kosovës.

“Sot, në pjesën veriore të Republikës kemi më pak shtet të Republikës sepse kryeministri i Kosovës i nxitur nga egoja e tij rrezikoi institucionet. Ne sot këtu i deklarojmë kryeministrit dhe bartësve të institucioneve se ne qëndrojmë fuqishëm në përkrahje të sovranitetit, të institucioneve të zbatimit të ligjit dhe gjithashtu qëndrojmë bindshëm për ruajtjen e partneritetit ndërkombëtar të Kosovës”, ka thënë Gashi.

Kryetarja e Grupit Parlamentar të LVV-së, i është drejtuar me një mesazh në gjuhën serbe, komunitetit serb në Kosovë.

Pas përfundimit të fjalimit të Kusari-Lilës, fjalën e ka marrë Shefi i Grupit Parlamentar të PDK-së, Abelard Tahiri.

Tahiri me humor tha se i njënjti nuk mundet të flasë serbisht sepse nuk din.

“Une smundem me fol serbisht se nuk di”, tha me humor Tahiri.