Kiev nën zjarre – Klitschko publikon pamjet e fundit nga shpërthimet/ Rusët i vendosin ultimatum Ukrainës për Mariupolin

Të paktën 902 civilë janë vrarë dhe 1,459 të tjerë janë plagosur në Ukrainë deri në mesnatën e 19 marsit, tha Zyra për të Drejtat e Njeriut e Kombeve të Bashkuara.

Shumica e viktimave janë shkaktuar nga armët shpërthyese, të tilla si artileria e rëndë, sistemet e hedhjes së raketave të shumëfishta, sulmeve me raketa dhe sulmeve ajrore tha Zyra për të Drejtat e Njeriut (OHCHR).

Sipas OHCHR-së, numri real i viktmave konsiderohet të jetë më i lartë, por ekipi i kësaj agjencie, që gjendet në Ukrainë, ende nuk ka arritur të marrë informacione apo të konfirmojë rastet e vrasjeve në disa qytete që janë goditur më rëndë, përfshirë edhe në Mariupol, tha agjencia.

Është ora 6 e pasdites, kur sirena e alarmit bie në Mikolajiv.

Me qetësi dhe me duart mbi bark, gratë shtatzëna në pritje për t’u bërë nëna, zbresin shkallëve që çojnë drejt bunkerit nëntokësor të spitalit të lindjes numër 3.

Shtatë gra në këtë repart pritet të lindin së shpejti, në një qytet ku lufta ka shpërthyer pa paralajmërim dhe në një shtet ku disa maternitete tashmë janë sulmuar, prej kur ka filluar pushtimi rus i Ukrainës.

Të dielën, presidenti ukrainas Volodymyr Zelensky tha se është i gatshëm të negociojë me presidentin rus Vladimir Putin, por paralajmëroi se nëse ndonjë përpjekje për negociata dështon, kjo mund të nënkuptojë se lufta midis dy vendeve do të çojë në "një Luftë të tretë Botërore".

“Jam gati për negociata me të. Isha gati për dy vitet e fundit. Dhe unë mendoj se pa negociata, ne nuk mund t'i japim fund kësaj lufte," i tha Zelensky Fareed Zakaria të CNN në një intervistë ekskluzive të dielën në mëngjes, përcjell “Bota sot”.

“Nëse ka vetëm 1% mundësi që ne ta ndalojmë këtë luftë, mendoj se duhet ta shfrytëzojmë këtë shans. Nne po humbasim njerëz në baza ditore, njerëz të pafajshëm në terren", tha ai.

Zelensky vazhdoi duke thënë se: “Forcat ruse kanë ardhur për të na shfarosur, për të na vrarë. Dhe ne mund të tregojmë se me dinjitetin e popullit tonë dhe ushtrisë sonë jemi në gjendje t'i japim një goditje të fuqishme, ne jemi në gjendje ta kthejmë kundër. Por, për fat të keq, dinjiteti ynë nuk do të ruajë jetë. Pra, unë mendoj se ne duhet të përdorim çdo format, çdo shans për të pasur një mundësi për të negociuar, mundësinë për të biseduar me Putinin. Por nëse këto përpjekje dështojnë, kjo do të thotë se kjo është një luftë e tretë botërore”.

Pas disa ditësh udhëtimi, ish-kryeministri i Mbretërisë së Bashkuar, David Cameron, ka mbërritur në Poloni për të ofruar donacione për refugjatët ukrainas.

Ai e bëri udhëtimin prej 1600 kilometrash, duke sjellë veshje, shtrat, pelena dhe komplete të ndihmës së parë të mbledhura nga projekti ushqimor i Oxfordshire, Chippy Larder.

Në një video në llogarinë e tij në Twitter, ai qëndronte në një depo të Kryqit të Kuq ku janë dorëzuar mallrat e dhuruara, raporton BBC.

Delivery successfully made! #StandWithUkraine️ 🇺🇦 pic.twitter.com/0eisBor72z

— David Cameron (@David_Cameron) March 19, 2022

“Është shumë ftohtë dhe ne jemi shumë të dëshpëruar, por gjithsesi ishte mirë të bëmë udhëtimin dhe mirë të dimë se ne po përpiqemi të bëjmë diçka për refugjatët që po vuajnë kaq shumë”, tha Cameron.

“Unë vozita për një pjesë të rrugës dhe udhëtimi kishte ecur pa probleme, përveç një gome të shfryrë që mori shumë kohë për t’u ndërruar”, shtoi ish-kryeministri.

Rusët kanë filluar të shkruajnë citate në makinat ushtarake në Ukrainë. Lajmin e ka konfirmuar Shtabi i Përgjithshëm i Forcave të Armatosura të Ukrainës, përmes një postimi në Facebook, përcjell Bota sot.

Aty thuhet se citatet janë marrë nga filmi "Brother", por sipas ukrainasve e vërteta është në anën e Ukrainës, pasi ata janë në tokën e tyre.

Ushtria ukrainase u ka bërë thirrje rusëve që të largohen nga territori i tyre, ose do të ketë më shumë pamje të teknikës së thyer dhe të djegur të pushtuesit.

"Shikoni, ata shkruajnë citate nga filmi "Brother" në makina. Dhe nuk e kuptojnë çfarë shkruajnë.

Harruan fjalët e protagonistit të tyre se pushteti është me të vërtetën!

Dhe e vërteta është për ukrainasit! Ne jemi në tokën tonë!

Dhe do të ketë gjithnjë e më shumë "peizazhe" të tilla me teknikën e thyer dhe të djegur të pushtuesve rusë.

Rusë, ndaloni, askush nuk po ju pret këtu.

Zoti u jept mendjen të varfërve.

Lavdi Ukrainës!", shkruhet në postimin e Shtabit të Përgjithshëm të Forcave të Armatosura të Ukrainës.

Edhe para se ushtria ruse të niste pushtimin e Ukrainës më 24 shkurt, çmimet e ushqimeve kanë qenë në rritje gjatë gjithë vitit të kaluar.

Sipas Organizatës për Ushqim dhe Bujqësi të Kombeve të Bashkuara (FAO), ushqimet - në nivel global - janë për 20 për qind më shtrenjtë seç kanë qenë një vit më parë.

Pandemia e koronavirusit dhe çrregullimet në zinxhirin e furnizimeve që e kanë pasuar atë, janë parë si shkaktarë kryesorë të rritjes.

Më 11 mars, FAO ka paralajmëruar për rritje të mëtejshme të çmimeve - deri në 20 për qind të tjerë, si pasojë e luftës në Ukrainë.

FAO ka thënë se Ukraina vështirë se do të mund të korrë grurin këtë sezon, ndërsa marrja e produkteve nga Rusia është bërë gjithashtu më e vështirë, pasi bizneset nuk duan të rrezikojnë të bien ndesh me sanksionet që ka ky shtet.

Por, nga këto dy shtete - Rusia dhe Ukraina - sigurohen gati 30 për qind e furnizimeve globale me grurë. Dhe, nga frika e mungesave, shumë vende kanë ndaluar tashmë eksportet e tyre, duke bërë që çmimet e shumë produkteve të kërcejnë ndjeshëm brenda ditësh, e disa prej tyre të shiten madje vetëm në sasi të limituara.

Shkrimin e plotë mund ta lexoni këtu.

Nëse tani jeni kyçur në blogun tonë, këto janë zhvillimet kyçe të ditës së 25-të të luftës në Ukrainë:

-Akuza për krime lufte dhe gjenocid: Presidenti i Ukrainës, Volodymyr Zelensky e ka akuzuar Rusinë për krime lufte gjatë rrethimit të qytetit jugor të Mariupolit. Ai tha se terrori në Mariupol do të mbahet mend me shekuj. Ndërkaq, zëvendëskryeministrja ukrainase, Olha Stefanishyna, akuzoi palën ruse për kryerje të akteve të “gjenocidit” gjatë pushtimit rus. Ajo tha se presidenti rus, Vladimir Putin, dhe liderët në Kremlin, “janë kriminelë lufte”.

-Bombardimi i shkollës: Zyrtarët ukrainas thanë se një shkollë arti në qytetin e rrethuar të Mariupolit, që përdorej si strehimore, është bombarduar nga forcat ruse. Sipas këshillit të qytetit, afër 400 persona po strehoheshin në shkollën, e cila u tha se është shkatërruar. Ende nuk dihet nëse ka viktima nga ky sulm, por autoritetet ukrainase thanë se njerëzit janë të bllokuar nën rrënoja.

-Raketa hipersonike: Për herë të dytë, Rusia tha se ka përdorur raketa hipersonike në sulmet në Ukrainë. Ministra ruse e Mbrojtjes tha se sistemi i raketave Kinzhal me raketa balistike ka shkatërruar një depo të madhe të karburanteve të Forcave të Armatosura ukrainase pranë vendbanimit Kostinatinivka në rajonin Mikolaiv.

-Vrasja e oficerit të marinës: Ukraina pretendoi se ka vrarë Andrey Paliy, kapiten i rangut të parë në marinën ruse. Ai u tha se u vra gjatë luftimeve të ashpra. Nëse ky lajm konfirmohet, atëherë Paliy do të ishte zyrtari i parë i lartë i marinës ruse i vrarë gjatë luftës në Ukrainë.

-Afër marrëveshjes: Ministri i Jashtëm i Turqisë, Mevlut Cavusoglu, tha se Ukraina dhe Rusia janë afër arritjes së një marrëveshjeje për çështje “kritike”. Ai nuk tregoi se për çfarë çështjesh bëhet fjalë, por tha se një armëpushim mund të arrihet nëse palët nuk bëjnë hapa prapa nga pozicionet e tyre aktuale.

-“Në anën e duhur të historisë”: Kina, që nuk e ka dënuar pushimin rus të Ukrainës, tha se sa i përket kësaj lufte, Pekini është “në anën e duhur të historisë”. Ministri i Jashtëm kinez, Wang Yi, tha se koha do ta dëshmojë se pozicioni i Kinës ka qenë i duhuri.

Ukraina pretendoi se ka vrarë një oficer të lartë të marinës ruse. Stafi i Përgjithshëm i Ukrainës shkroi në Facebook se kapiteni i rangut të parë, Andrey Paliy, u vra nga forcat ukrainase gjatë luftimeve të ashpra, edhe pse rrethanat rreth vrasjes së tij janë të paqarta.

Moska ende nuk ka komentuar lidhur me këto pretendime të Ukrainës, ndërkaq ky informacion nuk ka mundur të verifikohet në mënyrë të pavarur.

Paliy ishte zëvendëskomandant i flotës së Detit të Zi të Rusisë dhe besohet se është oficeri i parë i marinës që është vrarë gjatë pushimit rus të Ukrainës, që ka nisur më 24 shkurt.

Dhjetë milionë persona – mbi çereku i popullsisë – tashmë janë larguar nga shtëpitë e tyre në Ukrainë për shkak të luftës “shkatërruese” të Rusisë, tha shefi i agjencisë për refugjatë në Kombet e Bashkuara.

“Në mesin e përgjegjësive të atyre që nxisin luftëra kudo në botë, është dhimbja e shkaktuar ndaj civilëve të cilët detyrohen të largohen nga shtëpitë e tyre”, tha shefi i UNHCR, Filippo Grandi.

“Lufta në Ukrainë është aq shkatërruese sa që dhjetë milionë persona janë zhvendosur brenda vendit, apo si refugjatë jashtë Ukrainës”, tha ai.

UNHCR tha se 3,389,044 ukrainas janë larguar nga shteti që prej nisjes së pushtimit rus të Ukrainës më 24 shkurt. Ndërkaq, 60,352 persona vetëm të shtunën janë larguar nga vendi.

Afër 90 për qind e atyre që kanë ikur janë gra dhe fëmijë. Burrat ukrainas nga mosha 18 deri në 60 vjeç nuk mund të largohen nga shteti, pas mobilizimit të përgjithshëm ushtarak.

Sipas agjencisë së OKB-së për refugjatë, mbi 1.5 milion e refugjatëve janë fëmijë, teksa kjo agjenci paralajmëroi se rreziku nga trafikimi me qenie njerëzore është “real”.

Mbi gjashtë milionë persona besohet se janë të zhvendosur brenda Ukrainës.

Para konfliktit, Ukraina kishte një popullsi prej 37 milionë banorësh, pa llogaritur popullsinë në Gadishullin e aneksuar të Krimesl, dhe në dy rajonet lindore separatiste.

Presidenti Vladimir Putin duket se po përballet me një situatë të vështirë për shkak se shumica e shteteve Europiane, sëbashku me SHBA-në i është kthyer kundra që pas nisjes së luftës në Ukrainë.

Për më tepër, edhe nga ato shtete të cilat ai mund t’i quante aleate, duket se situate po merr një rrjedhë ndryshe. Një battalion vullnetar i forcave ushtarake të Bjellorusisë, kanë publikuar një video ku deklarojnë mbështetjen e tyre ndaj Ukrainës.

Në videon e publikuar nga The Express, ata zotohen për të zhbllokuar qytetin e Mariupolit që është rrethuar nga Rusia. Bjellorusia, e cila është një nga pak aleatët e mbetur të Vladimir Putinit , është përdorur për të nisur sulme dhe për të vendosur trupa në Ukrainë.

Megjithatë, njoftimi me video është një tjetër shenjë se pushtimi rus po i kundërvihet Presidentit Putin. 

Për lajmin e plotë klikoni KËTU.