LIVE: Kërcënimi me armë bërthamore nga Rusia, drejtori i CIA-s udhëton në Ukrainë – NATO jep verdiktin e fundit mbi luftën

Drejtori i CIA-s, Bill Burns, udhëtoi për në Ukrainë në fillim të këtij muaji për t’u takuar me presidentin ukrainas Volodymyr Zelensky dhe zyrtarë të tjerë, ndërsa lufta duket se po shkon në vitin e saj të dytë, sipas dy burimeve që kanë folur për CNN.

“Ndërsa ishte atje, ai përforcoi angazhimin e SHBA-së për të ofruar mbështetje për Ukrainën në luftën e saj kundër agresionit rus, duke përfshirë shkëmbimin e vazhdueshëm të inteligjencës”, tha një zyrtar amerikan për CNN.

Burimet nuk pranuan të japin detaje të mëtejshme rreth udhëtimit.

Udhëtimi i Burns vjen ndërsa SHBA-të janë gjithnjë e më shumë të shqetësuara se Rusia mund të përdorë armë bërthamore në luftën e saj të vështirë. Burns dhe zyrtarë të tjerë amerikanë kanë thënë publikisht se nuk shohin prova që Moska po përgatitet në mënyrë aktive për të ndërmarrë një hap të tillë, por zyrtarë të njohur me inteligjencën paralajmërojnë se rreziku është ndoshta më i larti që ka qenë që nga pushtimi i Rusisë në shkurt.

NATO nuk do të lejojë që Putini të fitojë luftën që ai filloi kundër Ukrainës dhe do t’i japë ndihmë Forcave të Armatosura të Ukrainës për aq kohë sa duhet, tha Sekretari i Përgjithshëm i NATO-s, Jens Stoltenberg në një konferencë për shtyp pas një takimi me kryeministrin rumun Nicolae Ciuca, kur u pyet për të parashikuar se sa mund të zgjasë lufta e Rusisë kundër Ukrainës.

“Luftërat janë nga natyra të paparashikueshme. Unë nuk do të spekuloj se sa do të zgjasë lufta. Unë do të them vetëm dy gjëra, dhe njëra është se ne jemi të gatshëm të mbështesim Ukrainën për aq kohë sa duhet.

Nuk mund ta lejojmë Putinin të fitojë. Kjo do të ishte një katastrofë, një tragjedi për ukrainasit, por gjithashtu do të na bënte ne, aleatët e NATO-s, më të prekshëm.

Sepse atëherë mësimi nga Ukraina për Presidentin Putin është se ai mund të arrijë qëllimet e tij duke përdorur forcën ushtarake. Dhe ky do të jetë një mësim jo vetëm për të, por edhe për liderë të tjerë autoritarë në mbarë botën”, tha Stoltenberg. 

A do ta hedhë Rusia në erë digën në Kakhovka? Cilat janë hapat e mëtejshëm në luftën kundër Cherson? Dhe çfarë roli luan Surovikin? Gjeneralmajori ukrainas jep përgjigje.

Ai është një nga heronjtë e mëdhenj në ushtrinë ukrainase: Kyrylo Budanov (36) është drejtor i komunikimit në Ministrinë e Mbrojtjes të Ukrainës dhe gjeneral-major. Prej muajsh ai ka luftuar strategjikisht në vijën e frontit kundër ushtrisë ruse, shkruan gazeta zvicerane Blick.ch transmeton “Bota sot”.

Tani ai në një intervistë për portalin e lajmeve “Pravda” thotë: “Rusët nuk sulmojnë objekte ushtarake, por vetëm civilë”.

Budanov është i bindur se Rusia ka një qëllim mbi të gjitha: Përhapjen e panikut. "Paniku dhe frika janë armët më të rëndësishme të terrorit," thotë ai. Qëllimi është që fillimisht të shkatërrohet furnizimi me energji në vend, pas të cilës do të ndalet edhe eksporti i energjisë elektrike nga Ukraina për ta zhytur vendin në rrënim ekonomik.

“Ëndrra e Rusisë është të lërë Ukrainën në errësirë ​​të plotë dhe në një dimër të ftohtë”. Por Budanov është i bindur se gjërat nuk do të shkojnë aq larg. Situata nuk është ende kritike.

Megjithatë, shefi i inteligjencës paralajmëron se dronët iranianë Shahed mund të përbëjnë një problem për Ukrainën për një kohë të gjatë.

Shkrimi i plotë

Më shumë se 70 mijë njerëz janë larguar nga rajoni Kherson gjatë javës së kaluar, ka pohuar guvernatori i rajonit i emëruar nga Rusia, Vladimir Saldo, sipas agjencisë së lajmeve TASS.

Saldo tha se banorët ishin larguar nga zona në mes të kundërofensive të Ukrainës.

“Është mjaft e vështirë të mblidhen statistika këtu, ato do të jenë të sakta vetëm aty ku mbahen të dhënat. Njerëzit kontaktojnë një qendër telefonike dhe shprehin dëshirën për të kaluar në bregun e majtë. Megjithatë, Kherson është një qytet mbi ujë dhe njerëzit këtu kanë varkat e tyre.

Megjithatë, jam i sigurt se mbi 70 mijë njerëz u zhvendosën javën e kaluar pasi ishte nisur një shërbim kalimi tragetesh”, ka thënë ai.

Nëse Rusia vendos të përdorë armë bërthamore ose një bombë të kontaminuar do të ketë pasoja, paralajmëroi sot Pentagoni.

“Do të kishte pasoja të rënda për Rusinë, nëse ajo përdor një armë bërthamore apo një ‘bombë të pistë’”, tha sekretari i shtypit i Pentagonit, Pat Ryder në një konferencë për shtyp.

Ryder tha se ai nuk do të hynte në detaje se cilat do të ishin pasojat, por shtoi se ato i ishin komunikuar në nivele të ndryshme Rusisë, përcjell ATA.

Gjithashtu, Pentagoni tha se pretendimet ruse se Ukraina po përgatiste një “bombë të kontaminuar” ishin të rreme. Ryder tha se SHBA-ja po monitoronte vazhdimisht situatën.

“Unë nuk do të hyj në detaje specifike se, si, kur dhe ku. Por, është e panevojshme të thuhet, është diçka që ne e marrim shumë seriozisht dhe vazhdojmë ta monitorojmë pa ndërprerje”, tha Ryder.

Këto imazhe tregojnë raketa balistike duke u lëshuar në ajër ndërsa forcat strategjike bërthamore të Rusisë morën pjesë në stërvitje, përcjell Bota sot.

Ministri rus i mbrojtjes Sergei Shoigu i raportoi Vladimir Putinit se stërvitja kishte për qëllim të simulonte një "sulm masiv bërthamor" të nisur si hakmarrje për një sulm bërthamor ndaj Rusisë.

Dhe administrata Biden tha se kishte marrë njoftim paraprak për stërvitjet vjetore.

Sipas raportimeve, hetuesit rusë kanë bastisur shtëpinë e gazetares së shquar ruse dhe ish-kandidates për presidente, Ksenia Sobchak, përcjell Bota sot.

Zonja Sobchak, 40 vjeçare, fillimisht fitoi rëndësi si një yll social dhe realitet televiziv përpara se të përfshihej në politikë kur ajo iu bashkua protestave masive në Moskë kundër Vladimir Putinit në 2011-12.

Më pas ajo u bë gazetare përpara se të konkurronte në zgjedhjet presidenciale të Rusisë në 2018 si një sfiduese liberale dhe të përfundonte me rreth 1.7% të votave.

Ajo është gjithashtu vajza e Anatoli Sobchak, një kryebashkiak liberal i Shën Petersburgut, për të cilin Putin shërbeu si deputet në vitet 1990.

Sot, hetuesit thanë se kontrolli në shtëpinë e Sobchak në Moskë ishte pjesë e një hetimi për keqbërje të dyshuar nga drejtori i saj i medias, Kirill Sukhanov, i cili u arrestua me akuzën e zhvatjes.

Agjencitë shtetërore të lajmeve TASS dhe RIA-Novosti thanë se zonja Sobchak kishte ikur nga Rusia, me TASS që pretendonte se kishte blerë bileta për në Dubai dhe Turqi për të mashtruar autoritetet, por përfundimisht u largua për në Bjellorusi, nga ku u zhvendos në Lituani.

Ambasadori i Rusisë në Mbretërinë e Bashkuar, Andrey Kelin, ka pohuar se ukrainasit kanë kaluar një “vijë të kuqe” në rastin e urës së Krimesë. Sipas tij, Moska i ka nisur sulmet me dron në të gjithë Ukrainën si hakmarrje për shpërthimin që ndodhi në urën e Krimesë në fillim të këtij muaji.

 “Çështja është ura e Krimesë. Ura e Krimesë është thelbësore për infrastrukturën tonë. Ukrainasit janë të vetëdijshëm se kjo është një vijë e kuqe që ata nuk duhet ta sulmojnë. E kanë dëmtuar rëndë dhe nuk duhet të jetë për t’u habitur që ka një përgjigje serioze për këtë,” tha ai për Christiane Amanpour të CNN të mërkurën.

Presidenti ukrainas Volodymyr Zelensky u shpreh se raketat ruse dhe dronët e prodhuar nga Irani kanë “shkatërruar më shumë se një të tretën” e sektorit energjetik të Ukrainës, në një konferencë ndërkombëtare të martën.

Kur u pyet mbi dronët, ambasadori pranoi se po përdoren në këtë zonë për shumë vite duke filluar nga viti 2014”.

Kelin mohoi sulmet ndaj civilëve ukrainas në sulme.

Zyrtarët e SHBA-së, BE-së dhe Ukrainës kanë thënë të gjithë se Moska ka shënjestruar qëllimisht civilët dhe presidentja e Komisionit të BE-së Ursula von der Leyen i dënoi sulmet e Rusisë ndaj infrastrukturës civile ukrainase si “akte të pastra terrori” të martën. 

“Nëse rezulton se përpjekjet ruse për shantazh bërthamor kanë sukses, bota do të jetë ë një vend më i rrezikshëm”, shkruan në analizën e tij për “Bloomberg”, eksperti i politikës evropiane dhe autori Andreas Klut.

“Duke përsëritur kërcënimet e tij për të hedhur armë bërthamore mbi Ukrainën ose vendet e tjera evropiane, Putin në thelb ka nisur një garë të re globale të armëve me këto armë djallëzore. Ai vërtetoi se të kesh bomba atomike të jep fuqi, ndërsa mospasja e tyre, si në rastin e Ukrainës të bën të pambrojtur. Pasoja e kësaj është se gjithnjë e më shumë vende do të ndërtojnë ose zhvillojnë arsenalet e tyre dhe do të rishikojnë strategjitë e tyre për përdorimin e tyre", thekson Klut.

"Thjesht shikoni titujt nga Azia në Evropë këtë muaj”, tha ai. Në Phenian, diktatori i Koresë së Veriut Kim Jong Un sapo ka lëshuar një raund tjetër raketash balistike, njëra prej tyre mbi Japoni dhe në Paqësor dhe ka simuluar sulme taktike bërthamore kundër fushave ajrore dhe objektivave të tjera në Korenë e Jugut.

Duket se po përgatitet për një tjetër provë bërthamore, e para në pesë vjet. Shumë do të varet nga mënyra se si do të përfundojë lufta e Putinit kundër Ukrainës, jo vetëm nëse Ukraina do të mbijetojë, por nëse Putini do të mbijetojë, madje edhe Rusia si një vend dhe një prishës (i marrëdhënieve) antiperëndimore në sistemin ndërkombëtar.

Nëse Putin ia del mbanë në përpjekjet e tij për shantazh bërthamor, bota është e dënuar. Nëse dështojnë, njerëzimi mund të jetë në gjendje të ngrejë tabu të reja kundër zhvillimit të luftës me ndarje atomike. Në rast se dikush është ende në dyshim, aksionet në Ukrainë janë vërtet globale, përfundoi Klut.

Forcat e Armatosura të Ukrainës shkatërruan një bazë të të ashtuquajturve ‘njerëzve të Kadyrov’, të cilët ishin evakuuar në bregun e majtë të Dnieper në rajonin Kherson. Deklarata është bërë nga anëtari i Këshillit Rajonal Kherson, Serhii Khlan në Facebook, raporton një korrespondent i Ukrinform“Kadirovitët u zhvendosën në bregun e majtë dhe nuk mund të mos bënin selfie dhe t’i postonin ato. Baza e tyre u shkatërrua nga Forcat e Armatosura të Ukrainës, ka shkruar Khlan.

Në një koment për kanalin Freedom TV, Khlan shpjegoi se Kadyrovitët ishin zhvendosur në bregun e majtë të Dnieper nga Kherson, ishin akomoduar në një nga ndërtesat dhe filluan të bënin selfie dhe t’i postonin në mediat sociale. “Falë TikTok, ata zbuluan vendndodhjen e tyre vetë. Forcat tona duhej vetëm të angazhonin një objektiv,” shtoi Khlan.

Thuhet se rreth 40 kadirovitë u vranë dhe 60 u plagosën rëndë. Kujtojmëse Forcat e Armatosura të Ukrainës kanë çliruar më shumë se 90 vendbanime nga pushtuesit rusë në rajonin Kherson. Masat e stabilizimit tani janë duke u zhvilluar brenda zonave të ç’pushtuara. Nga ana tjetër shtatë civilë u vranë dhe tre u plagosën në Bakhmut, një qytet në rajonin e Donjeckut në Ukrainën lindore, i cili ka qenë skena e betejavetë ashpra me ushtrinë ruse për muaj të tërë.

Në dy vendbanime të këtij rajoni janë gjetur edhe tre trupa të civilëve të cilët ishin vrarë më herët, sqaroi guvernatori Pavlo Kirilenko. Në shtator, ushtria ukrainase ka rimarrë mijëra kilometra katrorë në rajonet verilindore dhe jugore të vendit. Që atëherë, luftimet janë përqendruar kryesisht në rajonet lindore, ndërsa vazhdojnë paralelisht rreth Khersonit në jug.