LIVE: Ukrainasit hedhin në erë selinë e luftëtarëve të Ramzan Kadyrovit - Erdogan shkon në Rusi për këtë arsye!

Këshilltari i ministrit të Brendshëm ukrainas, Anton Gerashchenko në platformën X, ka publikuar një video që tregon momentin sesi ukrainasit hedhin në erë “selinë” e luftëtarëve të Ramzan Kadyrovit, njeriut të besueshëm të presidentit rus Vladimir Putin.

“Në Energodar, qytetin dhe komunën në veriperëndim të rajonit Zaporizhzhia, është herë në erë selia e luftëtarëve të Kadyrovit. Është zhvilluar nga lëvizja lokale e rezistencës, që e koordinoi Shërbimi Informativ i Mbrojtjes të Ukrainës”, tha Gerashchenko.

“Nga shpërthimi janë dëmtuar zyrat e improvizuara të njësisë OMON Akhmat-1 të Rosgvardia (Garda Kombëtare e Rusisë), si dhe veturat e parkuara në oborr”, u tha ndër tjera nga Gerashchenko.

Si pasojë e kësaj shpërtheu një zjarr i madh, e të dhënat për numrin e të vdekurve dhe plagosurve të luftëtarëve të Kadyrovit po mblidhen akoma nga autoritetet ukrainase.

Kujtojmë se nga fillimi i luftës lideri çeçen kishte dalë haptazi në krah të Vladimir Putinit, duke mbështetur pushtimin rus të Ukrainës.

Turqia njoftoi se presidenti Recep Tayyip Erdogan “shumë shpejt” do të vizitojë Rusinë, ku do të zhvillojë bisedime me homologun e tij rus, Vladimir Putin, për ringjalljen e marrëveshjes për eksportin e drithërave ukrainase, marrëveshje që mund të përdoret si trampolinë për negociata më të gjera të paqes me Ukrainën.

Zëdhënësi i partisë së Erdoganit, Omer Celin, u tha gazetarëve se ky takim do të mbahet në Soçi, qytet rus në Detin e Zi, dhe do të fokusohet në krizën aktuale ushqimore.

“Siç e dini, [Erdogan] do të vizitojë shumë shpejt Soçin”, tha Celik për gazetarët.

Agjencia e lajmeve Bloomberg më herët ka raportuar se Erdogan mund të takohet me Putinin më 8 shtator.

Zëdhënësi i Kremlinit, Dmitry Peskov, u tha gazetarëve se përgatitjet për takimin janë “intensive”, por nuk tregoi detaje për kohën dhe vendin ku do të takohen dy liderët.

Erdogan ka përdorur marrëdhëniet e tij të mira me Moskën dhe Kievin dhe ka tentuar që t’i bindë të dyja palët të zhvillojnë bisedime formale të paqes.

Lideri turk ishte takuar për herë të fundit me Putinin në Astana të Kazakistanit tetorin e vitit të kaluar.

Po ashtu, dy liderët kanë mbajtur një telekonferencë në prill për të inauguruar një central bërthamor të ndërtuar nga Rusia.

Turqia ndihmoi në negocimin e marrëveshjes së parë mes Ukrainës dhe Rusisë, që kur Moska nisi pushtimin e paprovokuar të fqinjit të saj në shkurt të vitit 2022. Marrëveshja mundësonte eksportin e drithërave nga tri porte ukrainase në Detin e Zi.

Rusia dhe Ukraina janë eksportuese të mëdha të produkteve bujqësore dhe kjo marrëveshje mundësoi uljen e çmimeve botërore të ushqimit.

Megjithatë, Moska u largua nga marrëveshja muajin e kaluar duke thënë se nuk ishin plotësuar kërkesat e saj që synojnë të lehtësojnë eksportin e produkteve bujqësore dhe plehrave artificiale të Rusisë.

Që atëherë, Rusia vazhdimisht ka sulmuar infrastrukturën në portet e Ukrainës dhe ka paralajmëruar se mund t’i vlerësojë si caqe ushtarake edhe anijet që kalojnë në Detin e Zi.

Megjithatë, Turqia nuk ka hequr dorë nga përpjekjet për të ringjallur marrëveshjen. Javën e kaluar, ministri i Jashtëm turk, Hakan Fidan, qëndroi në Kiev për të tentuar që të bindë Ukrainën që t’i bashkohet bisedimeve.

Gjatë vizitës, Fidan po ashtu i bëri thirrje Ukrainës që të mos krijojë rrugë të reja të eksportit – që raportohet se mbështeten nga Shtetet e Bashkuara dhe Bashkimi Evropian – për anijet e saj, nëse Rusia nuk përfshihet në marrëveshje deri në vjeshtë.

Fidan pritet që në ditët në vijim të qëndrojë në Moskë.

Që kur Rusia u tërhoq nga marrëveshja, Ukraina përdor rrugët tokësore dhe transportin përmes lumenjve për të eksportuar prodhimet e saj./REL

Një kolonel i shërbimit të inteligjencës të Ukrainës (SBU) është gjetur i vdekur në zyrën e tij në Kiev. Ai u gjet me një plagë me armë zjarri në kokë.

“Rrethanat e vdekjes së punonjësit të SBU-së po hetohen si pjesë e një hetimi penal të kryer nga hetuesit e policisë të Ukrainës, njoftoi SBU.

“Shërbimi do të ofrojë të gjithë ndihmën e nevojshme për policinë për kryerjen e një hetimi të plotë, objektiv dhe të paanshëm”, thanë ata.

SBU shprehu ngushëllimet e saj për familjen dhe miqtë e kolonelit të ndjerë.

Ndryshe luftimet e ashpra po vazhdojnë mes ukrainasve dhe rusëve, ndërsa të dyja palët qdo ditë raportojnë për të vrarë dhe të plagosur.

Banorë të Moskës diskutonin sot shtimin e sulmeve me dronë në kryeqytetin rus në dukje nga ushtria e Ukrainës.

Njerëz të intervistuar nga mediat shpreheshin të shqetësuar ndërsa të tjerë thanë se ndjeheshin të qetë, duke besuar se ishin mjaftueshëm të mbrojtur nga ushtria.

Pensionisti Konstantin, tha se ka besim te autoritetet dhe nuk shqetësohet për sulmet.

“Unë jam i qetë, ka personel e pajisje të mjaftueshme mbrojtjeje, sistemet e mbrojtjes ajrore thonë se janë në gatishmëri, pjesa tjetër nuk ka rëndësi”, u shpreh i moshuari.

Ndërsa 40 vjeçari Tigran, tha se ishte shqetësuar nga sulme e fundit natën në qendër të qytetit, por edhe ai në përgjithësi ndjehej i sigurt.

“Ka disa pasoja negative nga sulmet me dronë por në përgjithësi nuk ndjehem i trembur, deri tani jeta vazhdon normalisht”.

Një dron ukrainas goditi javës që shkoi një ndërtesë në ndërtim në zonën financiare të Moskës që ishte sulmi i gjashtë i këtij lloji në kryeqytetin rus.

Pamjet në media tregonin momentin e shpërthimit dhe vrimën që shpërthimi kishte lënë në fasadën e ndërtesës.

Zona financiare e Moskës është katër km larg ndërtesave qeveritare të Kremlinit.

Kryebashkiaku i Moskës, Sergei Sobyanin, ka thënë se mbrojtja ajrore ruse ka rrëzuar disa dronë të tjerë sulmues në pjesën perëndimore të qytetit.

Ukraina ka thënë se ka kryer sulmet për të treguar aftësinë e goditjes së Moskës dhe për të ruajtur vëmendjen e atyre që “duan të harrojnë sulmin ndaj Ukrainës”.

Që nga nisja e agresionit ushtarak nga Kremlini ndaj Ukrainës, numri i rusëve që kanë ikur nga vendi i tyre arrin shifrën e rreth 1 milion personave.

Sipas revistës The Economist, Serbia është shndërruar në “shtëpi të dytë” për rusët e larguar nga regjimi i Vladimir Putinit.

Prestigjiozja britanike thekson se eksodi i parë ndodhi në fillim të luftës, kur rreth 300 mijë rusë u larguan nga vendi në muajt e parë të agresionit të Moskë ndaj ukrainaseve.

Vala e dytë e ikjes së rusëve filloi kur Putin shpalli “mobilizimin e pjesshëm” në muajin shtator dhe të rinjtë e dëshpëruar vërshuan pikat kufitare për të shmangur rekrutimin.

Raportimet thonë se rreth 150 mijë rusë erdhën në Serbi, pra duke u bërë vendi i parë në botë që strehon qytetarë nga Rusia.

Analizës e kësaj reviste, e cila i referohet organizatës “Rrjeti për Analiza dhe Politika”, vlerësimet thonë se midis 817 mijë dhe 922 mijë qytetarë u larguan nga Rusia që nga shkurti 2022.

Ky është eksodi më i madh i vetëm i shkaktuar nga trazirat politike që nga viti 1920.

Kujtojmë se nga Serbia në Ukrainë për të luftuar krahë agresionit rusë kanë shkuar shumë ish-kriminelë të luftës. As Bashkimi Evropian e asnjë mekanizëm tjetër ndërkombëtar, nuk i ka bërë presion Serbisë që t’i ndalojë mercenarët për t’iu bashkëngjitur kësaj lufte.

Mediet e kontrolluara në Serbi përkundrazi vazhdojnë t’i thurin lavde Putinit, duke mbajtur marrëdhënie të mira me Kremlinin. 

Inteligjenca britanike sugjeron se Rusia ka “ka shumë të ngjarë” të anulojë një stërvitje të përbashkët strategjike të planifikuar, e cila zakonisht është një ngjarje e madhe vjetore.

Stërvitja ZAPAD (Perëndim) 23 ishte caktuar të ishte kulmi i vitit stërvitor të ushtrisë dhe do të zhvillohej muajin e ardhshëm, shkruan Sky News.

Rusia ka ndërruar stërvitjet e përbashkëta strategjike në të gjithë vendin në një cikël katërvjeçar që nga viti 2010, por Ministria Britanike e Mbrojtjes tha se Moska kohët e fundit i ka vendosur ato në perëndim të paktën çdo të dytin vit.

Dhe Ministria e Mbrojtjes britanike tha se kjo ishte për t’i dhënë përparësi “përballjes me atë që ajo e percepton si kërcënim nga NATO”.

“Performanca e ushtrisë ruse në Ukrainë ka nxjerrë në pah sesi JSE-të [stërvitjet e përbashkëta strategjike] kanë pasur vlerë të kufizuar stërvitore dhe kanë qenë kryesisht për shfaqje. Rusia ka të ngjarë të anulojë ZAPAD 23 sepse ka shumë pak trupa dhe pajisje”, ka thënë Ministria e Mbrojtjes.

“Ekziston një mundësi realiste që udhëheqja ruse të jetë gjithashtu e ndjeshme ndaj kritikave të brendshme, e cila është përgjegjëse për drejtimin e një JSE tjetër gjatë kohës së luftës”. 

Në një kohë afatshkurtër, Putini do të jetë më i fortë pas vdekjes së bashkëpunëtorit të tij dikur të ngushtë, Yevgeny Prigozhin, themeluesit të ushtrisë private të presidentit rus. Megjithatë, në planin afatgjatë, ai do të dobësohet.

Zyrtarët amerikanë dhe evropianë po analizojnë se si do të jetë situata për të fortin e Kremlinit në epokën pas Prigozinit, siç raporton në analizën e saj faqja “Politico”.

Aleatët perëndimorë të Ukrainës kryesisht argumentojnë se e ardhmja politike e liderit rus mund të jetë “e errët”.

Zyrtarët evropianë që përpiqen të vlerësojnë pasojat e vdekjes së shefit mercenar të Wagner-it, argumentojnë se ka të ngjarë që kjo situatë të forcojë kontrollin e tij në udhëheqjen e Rusisë, por do të dobësojë pozicionin e tij me kalimin e kohës.

Qeveritë e huaja ende po përpiqen të zbulojnë misterin e asaj që saktësisht e shkaktoi rrëzimin e avionit të Prigozhin të mërkurën e kaluar në Moskë, dy muaj pasi ai udhëhoqi një kryengritje të shkurtër dhe u përplas me forcat ruse për të protestuar ndaj politikave.

Zyrtarët perëndimorë që udhëtuan për në Moskë të enjten, shkruan Politico, argumentuan se vdekja e Prigozhin mund të ishte një nxitje e përkohshme, por e përkohshme për

Vladimir Putin.ose të paktën ta lërë fuqinë e tij të pandryshuar. “Putini ka një histori mjaft të qartë për të vepruar në vendin e tij pa u ndëshkuar,” tha një zyrtar amerikan i njohur me politikën ruse. “Unë nuk mendoj se ka ndonjë mekanizëm që ai të jetë përgjegjës… Vetëm sepse njerëzit e urrejnë dikë, nuk do të thotë domosdoshmërisht se ai do të jetë jashtë pushtetit.”

Përkundrazi, një zyrtar i dytë amerikan, gjithashtu i njohur me politikën ruse, tha: “Në të ardhmen e afërt, Putini do të jetë më i fortë, por në planin afatgjatë do të jetë më i dobët”.

Nga ana e tij, ministri estonez i Mbrojtjes, Hanno Pevkur, nënvizoi se, duke shfarosur kundërshtarët e tij “një nga një”, lideri rus detyron zyrtarët e tij të lartë të “ecin në vijën e tij”. “Shoqëria e frikës po zhvillohet me shpejtësi në Rusi dhe njerëzit kanë më shumë frikë se kurrë të dalin në rrugë për demonstrata apo diçka të tillë,” argumentoi ai, duke shtuar: “Në përgjithësi, diktatura në shtetin mafioz po rritet”.

Ka pasur raporte kontradiktore rreth asaj që çoi në rrëzimin e avionit të Prigozhin. Administrata Biden ka pohuar se nuk ka asnjë tregues se një raketë është përfshirë në rrëzimin, por ka lënë të hapur mundësinë e një bombe në fluturimin e caktuar. Në çdo rast, pakkush dyshon se Putini qëndron pas asaj që zyrtarët amerikanë besojnë se është një tentativë për vrasje.

“Vlerësimi ynë fillestar është se është e mundur që Prigozhin të jetë vrarë,”tha një zyrtar amerikan në kushte anonimiteti, duke folur për një çështje të ndjeshme dhe të klasifikuar.

Kishte gjithashtu disa spekulime në internet se Prigozhin nuk kishte vdekur dhe se përplasja ishte inskenuar si një mënyrë për ta zhdukur atë, por aparati i medias ruse nxitoi t’i zhvlerësonte këto thashetheme.

Për administratën Biden nuk ka pasoja për presidentin rus nga vdekja e liderit mercenar të Wagner pas rrëzimit të avionit. Presidenti amerikan dyshon se Putin qëndron pas rrëzimit të aeroplanit, ndërsa Këshilli i Sigurisë Kombëtare i SHBA-së theksoi të mërkurën se “lufta katastrofike në Ukrainë çoi në kryengritjen e ushtrisë private në Moskë dhe përfundimisht në vdekjen e Yevgeny Prigozhin”.

Pyetja e madhe është, siç shkruan Politico, si do të reagojnë mbështetësit e tij në grupin mercenar “Wagner” pas vdekjes së Prigozhin dhe nëse ata me kalimin e kohës mund të përbëjnë një kërcënim për Putinin.

Kremlini ka kaluar dy muajt e fundit duke u përpjekur të thithë shumë prej mercenarëve të Wagnerit në ushtrinë e vet. “Zhdukja e Prigozhin, në një kohë afat shkurtër konsolidon pozicionin e Putinit brenda sistemit. Le të shohim se si sillen mercenarët e mbetur të Wagner-it”, argumentoi një diplomat i lartë evropian. “Ekipi Wagner është çmimi”, shtoi diplomati i Evropës Perëndimore, duke folur në kushte anonimiteti.

Analistët e huaj besojnë se Kremlini ka të ngjarë të emërojë një figurë më pak të njohur si pasardhësin e Prigozhin për të drejtuar operacionet e grupit Wagner në Afrikë, duke siguruar që shefi i ri i mercenarëve rus të mos sfidojë Vladimir Putinin.

Pas kryengritjes së Prigozhin në qershor, zyrtarët amerikanë kishin parashikuar se Putini do ta eliminonte atë pasi besohet se ai kishte vrarë dhjetëra kundërshtarë të tij me kalimin e kohës.

Sanksionet perëndimore kanë dëmtuar rëndë ekonominë e Rusisë dhe udhëtimi i Putinit jashtë vendit është kufizuar pjesërisht për shkak të një urdhër-arresti të lëshuar kundër tij nga Gjykata Penale Ndërkombëtare.

Abbas Gallyamov, një ish-shkrues i fjalimeve të Putinit, argumentoi se vrasja e Prigozhin “forcon pozitën e Putinit mes elitës dhe e dobëson atë në sytë e publikut të gjerë”.

“Prigozin sfidoi publikisht sundimtarët… por Putini nuk e pranoi sfidën, por u fut si hajdut natën dhe e goditi me thikë pas shpine”, shkruan Galyamov.

Teksa ka ende pikëpyetje për pasojat e vdekjes së shefit të Wagner-it, Yevgeny Prigozhin, i cili u rrëzua me zëvendësin e tij dhe 8 persona të tjerë në Rusi gjatë një aksidenti ajror, luftimet vazhdojnë në Ukrainë.

Shërbimet e inteligjencës në Mbretërinë e Bashkuar besojnë se ekziston një "mundësi realiste" që forcat ruse të rrisin "intensitetin" e ofensivës së tyre në verilindje të Ukrainës gjatë dy muajve të ardhshëm, pasi të kenë humbur terren më në jug.

Sipas ekspertëve britanikë, sulmet ruse janë të mundshme në aksin midis lokaliteteve të Kupyansk, në rajonin e Kharkiv, dhe atij të Lyman, në Donetsk, ndoshta me synimin për të avancuar në drejtim të lumit Oskil dhe për të mbrojtur territoret tashmë të pushtuara.

Sipas analistëve ushtarakë, tashmë ka pasur "sulme në shkallë të vogël në veri-lindje, në sektorin Kupyansk-Lyman" me të cilat forcat ruse kanë bërë "progres të kufizuar", sipas vlerësimit nga Ministria e Mbrojtjes e Mbretërisë së Bashkuar.

Të gjitha në një kohë kur kundërofensiva e nisur nga trupat ukrainase "ushtroi presion mbi forcat ruse në Bakhmut dhe në jug të Ukrainës". Në këtë zonë të vendit, "Ukraina vazhdon të fitojë terren gradualisht".

Pra, sipas Ukrainës dhe Perëndimit, kundërofensiva ukrainase "po shkon sipas planeve të diskutuara paraprakisht me partnerët". Megjithatë, një takim sekret duket se ka ndryshuar gjithçka.

Takimi sekret

Sipas “The Guardian”, dymbëdhjetë ditë më parë një delegacion i NATO-s takoi disa liderë ushtarakë ukrainas në një vend të fshehtë në kufirin me Poloninë për të diskutuar pikërisht çështjet kritike të ofensivës ukrainase.

Gazeta britanike flet për një takim pesë-orësh mes përfaqësuesve të NATO-s, ku thuhet se ka marrë pjesë gjenerali amerikan Christopher Cavoli, komandanti suprem i forcave të NATO-s në Evropë dhe admirali britanik Tony Radakin, shefi i shtabit të ushtrisë së Mbretërisë së Bashkuar.

Qëllimi i samitit thuhet se ishte t'i jepte një shtysë të re kundërsulmimit të Kievit. Takimi, tepër sekret, thuhet se ka zgjatur rreth pesë orë dhe dyshohet se u mbajt në prani të shefit të ushtrisë ukrainase, gjeneralit Valerii Zaluzhny dhe të gjithë ekipit komandues, të cilin gazeta e quan "këshill lufte".

Burimet britanike hezitojnë të thonë shumë për rezultatin e takimit në kufi. Por indikacionet nga perëndimi janë se strategjia ka ndryshuar si rezultat i diskutimeve.

Kundërofensiva

"Unë mendoj se ju mund të shihni se ata janë duke u fokusuar në frontin e Zaporizhzhia," tha një burim, mes raporteve për sulme të reja ukrainase që synonin qytetin e Tokmak, një hap fillestar drejt arritjes së Detit Azov.

Në jug, forcat e Kievit po depërtojnë mbrojtjen ruse dhe në rajonin jugor të Khersonit po kapërcejnë blloqet e vendosura nga Moska. Përparim është bërë edhe në rajonin perëndimor të Zaporizhzhias, ku komandantët ushtarakë rusë kanë dhënë alarmin për shkak të mungesës së përforcimeve.

Edhe Instituti Amerikan për Studimin e Luftës konfirmon humbjet e rënda të pushtuesve ditët e fundit. Aksione intensive ka patur edhe në gadishullin e Krimesë.

“Forcat ukrainase mund të godasin kudo dhe në çdo kohë në Krime”, tha shefi i inteligjencës ushtarake të Kievit Kyrylo Budanov.

Hakmarrja e Rusisë

Sakaq, inteligjenca britanike, nga ana tjetër, ka ngritur alarmin, duke paralajmëruar se Rusia nuk do të rrijë duarkryq dhe do të përpiqet të rifillojë ofensivën në veri-lindje të vendit.

Objektivi ka të ngjarë të jetë avancimi drejt lumit Oskil dhe krijimi i një zone tampon rreth rajonit të Luhansk.

Po ashtu, dokumentet amerikane që janë deklasifikuar së fundmi zbulojnë se Rusia po ndjek një program "sistematik" të shpërndarjes së propagandës pro-Kremlinit përmes "objektivave civile" në Shtetet e Bashkuara dhe në Perëndim.

Në veçanti, Shërbimi Federal i Sigurisë Ruse ka punuar për disa kohë në përpjekje për të ndikuar politikën dhe opinionin publik duke dërguar civilë rusë të pavarur, për të ndërtuar marrëdhënie me figura të shquara, në mënyrë që të përhapet një narrativë pro-ruse në media.

Dhe me sa duket strategjia të paktën pjesërisht ka zënë rrënjë.

Dy persona u vranë në një sulm me raketa ruse gjatë natës në rajonin qendror të Poltava të Ukrainës, tha të hënën guvernatori Dmytro Lunin . Ai tha se sulmi ishte në një objekt industrial, por ai nuk dha detaje të mëtejshme.

“Si pasojë e sulmit me raketa dy persona kanë mbetur të vdekur, dy persona janë dërguar në spital me lëndime të lehta, ndërsa për momentin nuk dihet vendndodhja e dy personave të tjerë,” tha ai.

Ushtria ukrainase ka thënë se Rusia lëshoi ​​katër raketa nga Deti i Zi gjatë natës, dy prej të cilave u rrëzuan. Ushtria raportoi se rajoni i Kryvyi Rih u godit gjithashtu nga raketa në një sulm tjetër.

Autoritetet lokale thanë se disa shtëpi private u dëmtuan, por nuk u raportua për viktima.

Rusia pretendon se mbrojtja e saj ajrore e shkatërroi një dron që po i afrohej Moskës dhe dy të tjerë në një rajon në kufi me Ukrainën gjatë natës së 27 gushtit.

Mbrojtja ajrore në rrethinën Lyubertsy në juglindje të kryeqytetit “e rrëzoi një dron që po fluturonte drejt Moskës”, tha kryetari i qytetit, Sergei Sobyanin, në Telegram, po treguar se kush ishte sulmuesi.

“Nuk ka viktima apo dëme, sipas raportimeve fillestare. Shërbimet emergjente janë në vendin e ngjarjes”, shkroi ai, raporton REL.

Po ashtu, edhe Ministria e Mbrojtjes e Rusisë tha se mbrojtja ajrore e saj e shkatërroi një dron në rrethinën Lyubertsy rreth orës 4:30 të hënën dhe e fajësoi Kievin për sulmin.

Trafiku ajror në aeroportet e Moskës, Domodedovo dhe Vnukovo, u pezullua, sipas agjencisë shtetërore të lajmeve të Rusisë, TASS, e cila e citoi shërbimin e aviacionit.

Dy dronë të tjerë u shkatërruan nga mbrojtja ajrore në rajonin Bryansk në kufi me Ukrainën, tha Ministria e Mbrojtjes e Rusisë.

Ajo nuk tregoi nëse ka pasur viktima apo dëme.

Kryeqyteti dhe rajonet tjera ruse kanë qenë cak i sulmeve të njëpasnjëshme nga dronët ukrainas në javët e fundit, pasi Kievi u zotua në fillim të verës do t’i përgjigjet me luftë Rusisë