Një shpërthim në një rrugë tregtare të njohur në Këln mëngjesin e së mërkurës shkaktoi dëme të mëdha në një dyqan veshjesh, duke ngritur shqetësime për sigurinë në qytet.
Shpërthimi ndodhi rreth orës 5:00 të mëngjesit sipas orës lokale (0300 GMT) në hyrje të një dyqani veshjesh në Ehrenstrasse, vetëm disa qindra metra larg një klubi nate, i cili u shënjestrua në një sulm shpërthyes dy ditë më parë.
Nuk raportohet për viktima, por shpërthimi ka shkaktuar një zjarr të vogël në dyqan, i cili është shuar me shpejtësi nga zjarrfikësit.
Autoritetet po hetonin nëse dy shpërthimet në qendër të qytetit ishin të lidhura.
Departamenti i policisë së Këlnit publikoi fotografinë e të dyshuarit që shpërtheu një mjet shpërthyes në hyrje të klubit të natës të hënën dhe i kërkoi kujtdo që kishte informacion, të informonte ata.
Sipas raportimeve të mediave lokale, autoritetet dyshojnë se pas rrëmbimeve dhe shpërthimeve të fundit në Gjermaninë veriperëndimore mund të qëndrojnë bandat e drogës me lidhje me grupet mafioze në Holandë.
