Nën drejtimin e trajnerit Edi Martini, Teuta ka zhvilluar dje një seancë të karakterit tekniko-taktik ku stafi po jep këshillat e fundit në prag të takimit ndaj moldavëve.
Grupi është i plotë dhe të gjithë lojtarët kanë shfaqur gjendje optimale gjatë seancës së fundit të zhvilluar në Shijak.
Trajneri dje ka zgjedhur edhe një herë të punojë taktikisht me ekipin duke e vendosur në fushë në kushte loje, por duke i ushtruar më shumë presion qarkullimit të topit në distanca të ngushta dhe situatave të kundërsulmit qoftë aktiv edhe pasiv.
Në mbyllje të seancës stërvitore, ekipi ka provuar edhe një herë formacionin që do të zbresë nga minuta e parë në fushë dhe gjithçka është mbyllur këtu.
Gjithsesi, pritet që për 11-shen bazë, të vendoset vetëm 24 orë para ndeshjes.
