Dukej se këtë verë Samuel Umtiti kishte ardhur në vete. Pasi nuk llogaritej nga Ronald Koeman, ai kishte vendosur të ndryshonte skenën, për të qenë në gjendje ta rifillonte karrierën e tij të futbollit. Javën e kaluar, Barcelona dhe agjentët e lojtarit po bisedonin për të gjetur një zgjidhje për mbrojtësin qendror francez. Qëllimi ishte gjetja e një klubi të ri, por në fund, lojtari ka ndryshuar mendje përsëri, me një javë të mbetur nga mbyllja e merkatos, shkruan Telesporti.
Tani ai këmbëngul përsëri për të qëndruar në Barcelonë. Umtiti nuk dëshiron të pranojë asnjë nga propozimet që kanë ardhur për të. Ky pozicion i ri i ka zemëruar drejtuesit e klubit të Barçës, të cilët nuk e kuptojnë futbollistin, janë të tejngopur me kthesat e tij të papritura mbi të ardhmen. Kësaj indinjate i bashkohen edhe tifozët, të cilët e vërshëllyen francezin në trofeun e fundit “Joan Gamper”. Një pritje që zemëroi futbollistin francez, i cili u largua nga fusha në fund të lojës dhe nuk donte të dilte për të marrë trofeun me pjesën tjetër të shokëve të tij.
Telenovela “Umtiti” nis nga larg. Tashmë, në këtë merkato verore, në fillim mbrojtësi francez refuzoi të largohej nga klubi i Barçës, i bindur se këtë sezon, pasi të ishte shëruar nga gjuri, mund të kthehej për të konkurruar në nivelin më të lartë në “Camp Nou”. Klubi i tha atij se nuk llogaritej nga trajneri dhe se këtu do të ishte mbrojtësi i fundit qendror. Ai do të kishte Gerard Piqué, Eric García, Clement Lenglet, Ronald Araujo dhe Carscar Mingueza përpara. Përballë këtij skenari, Umtiti ra dakord për largimin më të mirë të mundshme nga Barça, pas tri vitesh të kushtëzuara nga lëndimet e vazhdueshme në gju.
Për më tepër, siç raportoi MD më 4 korrik, Barça madje i ofroi liri të plotë në mënyrë që ai të mund të negociojë me klubin që dëshiron dhe të fillojë një fazë të re larg nga “Camp Nou”.
Edhe atëherë, Samuel refuzoi të largohet. Pavarësisht kësaj, si Barça ashtu edhe agjenti i lojtarit vazhduan të punojnë krah për krah me propozimet e ndryshme që kishin në tryezë. Përveç Olympique Lyon, Roma gjithashtu u interesua për Umtiti, i cili nuk pranoi të shkonte te Besiktas turk, sepse nuk i garantoi pagën që francezi merr te Barça.
Ky është tani problemi kryesor i Barcelonës. Umtiti nënshkroi një kontratë deri në vitin 2023 pak para Kupës së Botës 2018, kur pranoi se kishte luajtur me shqetësime në gju. Ai u kthye si kampion bote, i shenjtëruar si një nga qendërmbrojtësit më të mirë në planet, por me një gju të dëmtuar rëndë. Dhe ai kurrë nuk ishte më i njëjti. Kjo është arsyeja pse aktualisht nuk ka asnjë skuadër të aftë t’i afrohet pagës së Samuel Umtiti, aq sa merr te Barcelona.
