Pak ditë më parë në fushën që i ngjante një liqeni, u luajt ndeshja e Kategorisë së Dytë, Përmeti-Labëria.
Pamjet u bënë menjëherë virale dhe objekt memesh në rrjetet sociale. Reshjet e shiut kishin shkaktuar "puse" të mëdha uji, që ia bënin lojtarëve të pamundur të luanin në një terren të tillë. Në fund ishte Labëria, ajo që triumfoi me rezultatin 0-2.
Ndërkohë Përmeti është rikthyer sërish në skenë, por kësaj here në lidhje me disa gërmime që kanë nisur në aneksin e stadiumit.
Mësohet se autoritetet greke po punojnë për të hapur një tjetër varrezë masive, pasi dyshohet se gjenden eshtrat e ushtarëve grekë, që nga koha e Luftës së Dytë Botërore gjatë luftës italo-greke. Kërkimet kanë nisur që prej të hënës dhe komisioni i përbashkët greko-shqiptar ka urdhëruar hapjen e një parcele të pozicionuar përbri stadiumit të qytetit të Përmetit. Dyshohet se në këtë parcelë me sipërfaqe 80×40 metra, gjenden të paktën eshtret e 100 ushtarëve grekë.
Por problemi është se në këtë fushë stërviten ekipet e moshave të Përmetit, konkretisht ato U-13 dhe U-15. Nga klubi t honë se nuk janë lajmëruar fare për këto gërmime.
Në lidhje me këtë, ka folur për "Panorama Sport" edhe kapiteni i skuadrës Erald Karalliu. “Kemi qenë në dijeni se do bëheshin gërmime afër stadiumit, por jo aq afër.
Sot (dje) po shkonim në stërvitje dhe pamë që një pjesë e aneksit ishte rrethuar dhe kishin nisur punën punonjës të bashkisë. U habitëm në fakt, pasi nuk e prisnim që të gërmohej pikërisht në aneks dhe në pjesën e pasme të shkallëve. U interesuam dhe na thanë se kanë marrë leje nga qeveria dhe pushteti lokal”- tha Karalliu.
