Stiven dhe Kristian Shpendi po bëhen pak nga pak emra të njohur në futbollin e rëndësishëm.
Stiven ka siguruar këtë verë kalimin nga Çezena në Serinë C te Empoli në Serinë A dhe ka debutuar në elitë duke marrë mjaft vlerësime.
Ndërsa vëllai i tij binjak po e zëvendëson më së miri te Çezena, me rolin e qendërsulmuesit me gola dhe asiste në këtë start të sezonit.
Ëndrra e të dyve është që të luajnë në elitë dhe të bëhen të famshëm në futbollin italian, siç shumëkush ka parashikuar që kur shkëlqenin në radhët e skuadrës së të rinjve të Çezenës. Dhe të dy duket se kanë një klub në mendje.
Ka qenë vetë Stiven ai i cili ka zbuluar në një intervistë për “Eleven Sports” se cila është ëndrra e dy ”binjakëve të tmerrshëm” siç i quanin në vitin te të rinjtë e Çezenës. “Që kur ishim të vegjël, kemi bërë gjithmonë tifo për Interin.
Një ëndërr e përbashkët do të ishte të luanim në Serinë A së bashku te Interi”, kishte shpjeguar këtë fundjavë Stiven, vetëm pak minuta para se të zbriste në fushë si titullar në Serinë A, pikërisht përballë Interit “të tij”.
