“Kush nuk kërcen është juventin”, nisën të thërrisnin në kor tifozët e Napolit sapo mori fjalën Antonio Conte gjatë prezantimit të skuadrës për sezonin 2024/2025.
Tekniku nga Lecce, i cili ka qenë kapiten i Juventusit gjatë periudhës që luante futboll, qëndroi i heshtur, teksa i shoqëroi me buzëqeshje thirrjet e napolitanëve.
Më pas rimori fjalën dhe iu drejtua tifozëve të rinj me një mesazh të qartë, ku ndër të tjera tha:
“Le ta kemi të qartë një gjë. Në futboll si në jetë gjithmonë duhet respekt. Ju jeni tifozë dhe me të drejtë mbështesni ekipin tonë. Do të jem gjithmonë një person shumë i sjellshëm dhe i respektueshëm.
Por mos më kërkoni gjëra që nuk do t’i bëj… Jo për një ekip të vetëm, por për të gjitha skuadrat.
Sepse ne trajnerët e kemi detyrë të përcjellim shembullin pozitiv.
Ajo që mund t’u them është se ju keni përballë tifozin numër një të Napolit”, theksoi Conte, diskutimi i të cilit u shoqërua me duartrokitje.
