Ngrënia e një hot dog-u të vetëm mund t’ju marrë 36 minuta jetë, sipas një studimi të ekspertëve të shëndetit në Universitetin e Michigan-it.
Në studimin e botuar në revistën Nature Food, studiuesit shqyrtuan 5,853 ushqime dhe matën efektet e tyre në minuta të jetës së shëndetshme – të fituara ose të humbura.
“Ne donim të bënim një vlerësim të shëndetit të bazuar te ndikimet e dobishme dhe të dëmshme të ushqimit në të gjithë dietën,” tha për CNN Olivier Jolliet, profesor i shkencave të shëndetit mjedisor në universitet dhe autor i studimit.
Ata përdorën The Global Burden of Disease Study (GBD) – një program gjithëpërfshirës kërkimor rajonal dhe global i sëmundjeve që vlerëson vdekshmërinë dhe paaftësinë nga sëmundjet kryesore, dëmtimet dhe faktorët e rrezikut. GBD është një bashkëpunim i mbi 3,600 studiuesve nga 145 vende dhe financohet nga Bill and Melinda Gates Foundation.
Lexo edhe: Nga fillimi i javë 31 persona kanë vdekur nga Covid-19 në Kosovë
“Për shembull, ju humbni 0.45 minuta për gram mish të përpunuar, ose 0.1 minuta fitohen për gram fruta. Ne pastaj shohim përbërjen e secilit ushqim dhe më pas e shumëzojmë këtë numër me profilet përkatëse të ushqimit që kemi zhvilluar më parë,” tha Jolliet.
Një nga ushqimet e matura nga studiuesit ishte një hot dog. Sasia e mishit të përpunuar rezultoi në humbjen e 27 minutave të jetës së shëndetshme, tha Jolliet – por vlera përfundimtare është 36 minuta për shkak të përbërësve të tjerë si natriumi dhe acidet yndyrore.
Konsumimi i ushqimeve të tilla si arrat, bishtajoret, ushqimet e detit, frutat dhe perimet, nga ana tjetër, kanë efekte pozitive në shëndet.
“Çështja është të zgjedhësh ushqime më të mira, të mos kalosh kohë duke bërë matematikë, shtoi Jolliet.
