Bisedat e vështira janë një pjesë e çdo marrëdhënieje, por shpesh shmangen për shkak të frikës se si do të reagojë partneri ose se çfarë efekti do të ketë në lidhjen tuaj
Megjithatë, nëse këto biseda nuk zhvillohen, pakënaqësitë e vogla mund të rriten dhe të dëmtojnë të ardhmen e marrëdhënies. Atëherë, si të përballemi me këto momente me më pak stres dhe më shumë siguri?
Ja 4 hapa që mund t’ju ndihmojnë të përballoni çdo bisedë të vështirë me sukses:
1. Zgjidh momentin e duhur
Nuk ka asgjë më të keqe sesa të nisesh për të diskutuar diçka të rëndësishme në një moment të papërshtatshëm. Të gjithë kemi përjetuar ato momente kur tensioni grumbullohet dhe shpërthen papritur për shkak të ndonjë incidenti të vogël.
Për të shmangur këto shpërthime, është thelbësore të zgjedhësh momentin e duhur për të biseduar. Kur ti dhe partneri jeni të qetë dhe në një gjendje emocionale të qëndrueshme, atëherë mund të keni një diskutim të shëndetshëm pa stres të panevojshëm. Madje, mund t’i japësh partnerit mundësinë të zgjedhë kohën, duke thënë: “Ka diçka që dua të diskutojmë, a është tani momenti i duhur, apo të presim më vonë?”
2. Kupto veten dhe mesazhin
Para se të hapësh bisedën, merr një moment për të qartësuar brenda vetes atë që dëshiron të shprehësh. Shpesh, kur jemi të shqetësuar, i nënvlerësojmë ndjenjat tona dhe mendojmë se “nuk është dhe aq e rëndësishme”.
Por, nëse diçka po të mundon vazhdimisht, duke krijuar dialogë të brendshëm të pafund, është më mirë ta diskutosh hapur. Qartësohu në mendime dhe përcakto thelbin e asaj që dëshiron të komunikosh.
Nëse hyn në bisedë me një synim të qartë, do të kesh më shumë mundësi të mos humbasësh fokusin dhe të mbash kontrollin e situatës.
3. Jepi partnerit ndjenjën e sigurisë emocionale
Të dy jeni ndoshta të shqetësuar kur nisni një bisedë të vështirë. Prandaj, krijimi i një ndjenje sigurie emocionale është thelbësor.
Filloni duke treguar se i kuptoni ndjenjat e tij. Një mënyrë e shkëlqyer për ta bërë këtë është të nisni bisedën duke treguar dobësinë tuaj. Për shembull: “Nuk është e lehtë të flas për këtë sepse jam e shqetësuar se si do reagosh” ose: “Kam frikë se mund të të bëj të ndihesh keq, por është diçka që dua të diskutojmë që të kuptohemi më mirë.”
Ky lloj sinjali jo vetëm që e bën partnerin të ndihet më i sigurt, por gjithashtu krijon një mjedis ku të dy ndiheni më të hapur dhe të gatshëm për të dëgjuar njëri-tjetrin.
4. Mos e lër bisedën për momentin e fundit
Një nga gabimet më të zakonshme është të presësh derisa problemet të grumbullohen, duke i lënë pa adresuar për një kohë të gjatë. Kur i mban shqetësimet për një kohë të gjatë, çdo detaj i vogël mund të bëhet pika që shkakton shpërthimin emocional. Zgjidh një moment të përshtatshëm, mos e lër gjithçka për në fund.
Vendos ta bësh këtë bisedë në një kohë kur ndihesh gati dhe partneri është më i qetë. Mos e shndërro një shqetësim të vogël në një dramë të madhe, për shkak të vonesës dhe tensionit të grumbulluar, citon Anabel.
Bisedat e vështira nuk kanë pse të jenë aq të frikshme sa i imagjinojmë. Duke zgjedhur momentin e duhur, duke u qartësuar për atë që dëshiron të thuash dhe duke krijuar një ndjenjë sigurie emocionale, mund të zhvillosh një diskutim të shëndetshëm që jo vetëm zgjidh problemet, por edhe forcon lidhjen tuaj.
