Komunikimi është thelbësor për një lidhje të shëndetshme, por shpesh mënyra se si flasim bëhet problem, jo mungesa e fjalëve
Shprehja famëkeqe “duhet të flasim” është një shembull klasik që shpesh shkakton më shumë tension sesa zgjidhje.
Mendoni pak: sa herë keni nisur një bisedë të tillë dhe keni përfunduar më larg partnerit tuaj?
Kjo ndodh sepse qasja e gabuar shpesh krijon një efekt domino të distancimit emocional, mospërqendrimit dhe mungesës së mirëkuptimit. Por, mos u shqetësoni: ka mënyra të tjera që funksionojnë më mirë.
Vetë fraza e nis bisedën me një ton negativ. Ajo nënkupton që dikush ka gabuar, duke ngritur tensionet para se biseda të fillojë. Në shumicën e rasteve, përfundon në një cikël faji dhe mbrojtjeje, ku asnjëra palë nuk ndihet e dëgjuar.
Për shembull, nëse një partner ankohet: “Gjithmonë je në telefon gjatë darkës! A nuk të intereson lidhja jonë?” – kjo shprehje më shumë sulmon sesa shpreh ndjenjat. Reagimi? Partneri tjetër mbrohet duke thënë: “Jam e zënë me punë, pse më sulmon kot?” Rezultati? Zero zgjidhje.
Si të përmirësoni komunikimin në tre hapa
Për të kaluar nga tensioni në mirëkuptim, provoni këto tre teknika:
1. Mos nisni me kritika
Në vend që të nisni me një ankesë, përpiquni të shprehni një mendim pozitiv ose empati. Për shembull, në vend që të thoni: “Pse gjithmonë je në telefon gjatë darkës?”, mund të thoni: “E vlerësoj shumë kohën tonë së bashku gjatë darkës dhe ndihem paksa i/e shkëputur kur përdoren telefonat. Mund ta shmangim këtë zakon?”
Pse funksionon: Kjo qasje krijon një atmosferë bashkëpunimi dhe jo konflikti. Mesazhi juaj përcillet si dëshirë për lidhje, jo si kritikë.
2. Shprehni ndjenjat tuaja pa fajësuar
Përdorni fjali që fillojnë me “unë” për të shprehur emocionet tuaja pa sulmuar partnerin. Për shembull, mund të thoni: “Ndihem i/e mbingarkuar kur nuk flas hapur për ndjenjat e mia më herët. A mund të gjejmë kohë për të diskutuar para se të më mblidhen brenda?”
Pse funksionon: Duke e bërë bisedën rreth ndjenjave tuaja, shmangni mbrojtjen e partnerit dhe përqendroheni në zgjidhjen së bashku.
3. Ftoni zgjidhje, mos i imponon
Në vend që të theksoni vetëm problemin, përpiquni të propozoni zgjidhje bashkë. Për shembull, mund të thoni: “S’e kuptova sa shumë të shqetëson kjo gjë. Mbase mund të provojmë rregullin ‘pa telefona gjatë darkës.’”
Pse funksionon: Një qasje bashkëpunuese bën që të dy partnerët të ndihen të vlerësuar dhe të përfshirë në vendime.
Këshilla për biseda më efektive
Zgjidhni momentin e duhur: Shmangni bisedat e vështira kur emocionet janë të larta ose kur jeni të shpërqendruar. Një ambient i qetë dhe privat mund të bëjë ndryshim të madh.
Dëgjoni me vëmendje: Përpiquni të përsërisni atë që dëgjoni, si p.sh.: “Pra, ndihesh i/e shkëputur kur përdor telefonin gjatë darkës. A e kuptova saktë?” Kjo qasje e thjeshtë ul tensionet dhe forcon lidhjen.
Shikoni drejt së ardhmes: Në vend që të përqendroheni te gabimet e së shkuarës, përpiquni të flisni për zgjidhje konkrete dhe si mund të ecni përpara së bashku.
