A ndihesh sikur ke qenë beqar/e për një kohë vërtet të gjatë?
Epo, ti nuk je vetëm. Termi “kronikisht beqar/e” është bërë viral në TikTok me disa video që kanë arritur më shumë se 10 milionë shikues në mbarë botën.
Ka dy lloje beqarësh: beqarë që janë të lumtur që janë beqarë dhe beqarë që nuk janë të lumtur duke qenë beqarë.
“Ka njerëz që janë beqarë dhe është e dhimbshme për ta dhe në fakt mendoj se është më mirë [kështu] sepse janë të motivuar të provojnë gjëra të ndryshme,” tha Amy Chan, autore dhe themeluese e “Renew Breakup Bootcamp”, një vendstrehim që merr një qasje shkencore dhe shpirtërore ndaj shërimit pas ndarjes.
“Më keq është kur beqarët kanë një jetë të mirë dhe nuk është se janë të pakënaqur me beqarinë e tyre, kështu që nuk ka një pikë dhimbjeje për t’i motivuar ata të dalin jashtë zonës së tyre të rehatisë,” vazhdon ajo.
“Pra, edhe pse të qenit në një partneritet do të ishte e mahnitshme, rreziku për t’u refuzuar dhe për të bërë të gjitha gjërat që vijnë me procesin e takimit është e tepërt për disa beqarë; ata thjesht nxjerrin justifikime dhe shmangin situate që mund të jenë fitimprurëse,” tha Chan.
Bazuar në përvojën e saj në mentorimin e klientëve, këtu janë tre modele që Chan ka vërejtur tek njerëzit që janë “kronikisht beqarë”:
Ata janë të orientuar drejt të thënit “jo”
Një model që Chan ka vëzhguar përmes punës së saj është se ata që priren të jenë beqarë për një kohë të gjatë janë njerëz që pëlqejnë të thonë “jo”.
“Diçka që kam vënë re me shumë nga klientët e mi të suksesshëm është se ata thjesht thonë ‘jo’ dhe ‘skualifikojnë’ njerëzit përpara se t’u japin ndonjë shans,” tha Chan.
“Ata nuk lejojnë kurrë që kjo lidhje të ketë ndonjë potencial për t’u rritur, sepse në kokën e tyre, ata kanë një ide se çfarë duan, e cila mund edhe të mos jetë domosdoshmërisht ajo që u nevojitet.”
Beqarët kronikë priren të fokusohen shumë në papërsosmëritë e personit tjetër. “Ata kanë një ide të personit ideal në kokën e tyre dhe kjo më shumë ka të bëjë me kënaqësinë e egos së tyre sesa të krijuarit një lidhje kuptimplotë,” tha Chan në një video për TikTok-un.
Ata sabotojnë marrëdhëniet e tyre
Një model tjetër i “beqarëve kronikë” është se ata priren të sabotojnë marrëdhëniet e tyre. “Një mënyrë se si njerëzit sabotojnë marrëdhëniet është se ata investohen në njerëz të padisponueshëm,” tha Chan.
“Shumë herë, ata do të fajësojnë qytetin në të cilin ndodhen partnerët potencialë, ose thonë se ‘të gjithë djemtë janë të tillë’ ose ‘të gjitha vajzat janë të tilla’,” tha ajo. “Dhe një arsye shumë e zakonshme pse njerëzit beqarët kronikë zgjedhin njerëz të tillë është se ndihen të tërhequr për të ndenjur me njerëz të padisponueshëm; dhe kjo është në fakt një mënyrë për të shmangur intimitetin.”
Kur këta lloj beqarësh pyeten, mund të thonë se nuk kanë një tip, por Chan thotë ndryshe. Edhe pse mund të mos jetë një tip fizik, beqarët që mbeten beqarë për një kohë të gjatë mund të kenë një “tip emocional”, shpjegoi ajo.
“Mund të jetë lidhja ankthioze, mund të jetë padisponueshmëria, çfarëdo qoftë ajo,” shpjegoi Chan. “Kjo përvojë emocionale është në fakt tipi i këtyre beqarëve dhe do të vijë gjithmonë në paketime të ndryshme për ta.”
Ata nuk e tregojnë veten të hapur për t’u njohur
Pavarësisht nëse nuk u mbetet kohë nga oraret e tyre të ngjeshura ose nuk bëjnë përpjekje për të takuar njerëz të rinj, një model tjetër që Chan ka vërejtur tek njerëzit që qëndrojnë beqarë është se ata nuk krijojnë hapësirë në jetën e tyre për takime.
“Ka shumë mite për dashurinë dhe marrëdhëniet që njerëzit mendojnë se janë të vërteta. Një prej tyre është se ‘dashuria ndodh atëherë kur nuk e pret’”, tha Chan. “Dhe kështu, [ata] nuk e vendosin veten të hapur për kërkim.”
“Kam pasur shumë njerëz që kanë thënë: ‘Do të ndodhë kur të ndodhë’ dhe unë u kam thënë, ‘Por ti punon gjithë ditën dhe pastaj shkon menjëherë në shtëpi. Në çfarë pike do të të godasë dashuria? Kur të jesh duke parë televizor?’”
“Është pothuajse një justifikim për të mos lëvizur vetë ndonjë gur, sepse ata janë shumë rehat duke qenë beqarë,” tha Chan.
