Një studim i ri i botuar në British Journal of Dermatology sugjeron se flokët e gjatë në lëkurën e kokës evoluuan si mbrojtje kundër nxehtësisë ekstreme në habitatet e hershme njerëzore dhe rregullimi i tyre lidhet me mekanizma të caktuar molekularë që mund të ofrojnë zgjidhje të reja për trajtimin e humbjes së tyre.
Studimi u krye nga Universiteti Penn State, Universiteti i Kalifornisë, Irvine dhe Universiteti Kombëtar i Tajvanit. Nina Jablonski nga Universiteti Penn State, tha se flokët e njeriut kanë një rëndësi të thellë biologjike dhe sociale.
“Atributet e flokëve, si gjatësia, forma, ngjyra dhe humbja, luajnë një rol kyç në komunikimin social dhe tregojnë origjinën, moshën, shëndetin dhe statusin social”, tha Jablonski, e cila është njëra nga autorët e studimit.
Në studimin e ri, shkencëtarët u mbështetën në njohuritë e mëparshme rreth rolit funksional të flokëve te njerëzit dhe gjitarët e tjerë. Autorët e studimit argumentojnë se aftësia për të rritur flokë të gjatë ishte një përshtatje kryesore për mbijetesën.
“Flokët e gjatë dhe kaçurrela i lejuan paraardhësit tanë të mbijetonin në kushte ekstreme termike duke reduktuar ekspozimin ndaj rrezatimit diellor dhe duke ruajtur lëngjet vitale të trupit”, shpjegon Jablonski.
Teza kryesore e studimit të ri është se aftësia për t'u rritur ishte e pranishme në gjenomin e njeriut shumë kohë më parë në të kaluarën evolucionare dhe se ajo u aktivizua nga një kombinim i faktorëve mjedisorë dhe biologjikë.
Bashkautori i studimit Sung-Jan Lin, një profesor i inxhinierisë biomjekësore në Universitetin Kombëtar të Tajvanit, thotë se këta shembuj "tregojnë se plani molekular për rritjen e flokëve të gjatë ka ekzistuar gjithmonë.”
"Projekti molekular për rritjen e flokëve të gjatë ka ekzistuar gjithmonë, ai ishte thjesht në një gjendje 'të fjetur. Kur paraardhësit tanë zhvilluan aftësinë për të rritur flokë jashtëzakonisht të gjatë, ka shumë të ngjarë që ishte rezultat i disa ndryshimeve gjenetike që riaktivizuan një program para-ekzistues, në vend që të evoluonte një mekanizëm krejtësisht i ri," tha ai.
Ky zbulim hap derën për terapi të reja ndaj rënies së flokëve. Sipas Maksim Plikus nga Universiteti i Kalifornisë Irvine, të kuptuarit sesi folikulat e njeriut arrijnë të krijojnë flokë të gjatë i lejon shkencëtarët të identifikojnë objektivat molekularë për terapitë efektive për ata që kanë humbur flokët.
“Kjo njohuri mund të çojë në trajtime që do të stimulojnë rritjen e flokëve dhe do të lehtësojnë stresin emocional që shpesh shoqëron rënien e flokëve”, tha Plikus.
Trajtimet ekzistuese për rënien e flokëve sot përfshijnë medikamente si minoxidil dhe finasteride, të cilat mund të ngadalësojnë procesin. Por zbulimi i një çelësi molekular që rregullon rritjen e flokëve të gjatë mund të mundësojë zhvillimin e terapive precize që do të riaktivizojnë folikulat e fjetura të flokëve.
Studiuesit planifikojnë të fokusohen në punën eksperimentale që duhet të identifikojë gjenet specifike dhe rrugët sinjalizuese të përfshira në këtë proces. Nëse mund të zhvillohet një mënyrë për të "ndezur" këtë program gjenetik, mund të gjendet një terapi revolucionare për personat tullacë.
Kujtojmë, gjëndra e flokëve është jashtëzakonisht komplekse, ndaj ka një numër të madh sëmundjesh të ndryshme të flokëve dhe kokës, secila prej të cilave ka një mekanizëm krejtësisht të ndryshëm të origjinës dhe përparimit, gjë që pengon zhvillimin më të shpejtë të njohurive dhe terapive të reja.
