Ka diçka që i dallon marrëdhëniet e forta dhe të qëndrueshme nga ato që çahen lehtësisht nën presion.
Nuk është thjesht dashuri, por diçka më e thellë – aftësia e partnerëve për të kapërcyer sfidat së bashku, të ndjehen të lidhur dhe të kuptojnë njëri-tjetrin në një nivel intim, pohon psikologia Cara Gardenswartz.
“Çelësi për një marrëdhënie të qëndrueshme dhe përmbushëse qëndron në diçka që nuk është menjëherë e dukshme – afërsia emocionale. Ajo ndërtohet përmes hapjes, besimit të ndërsjellë dhe gatishmërisë për t’i treguar partnerit tuaj edhe anët tuaja më të cenueshme. Kur ka hapësirë për shprehje të sinqertë të mendimeve dhe ndjenjave pa frikë nga gjykimi, marrëdhënia bëhet më e thellë dhe më elastike”, shpjegoi ajo për Psychology.
Nga ana tjetër, kur lidhja emocionale humbet, partnerët mund të fillojnë të ndjejnë distancë, keqkuptime dhe mungesë mirëkuptimi, edhe nëse janë fizikisht të pranishëm pranë njëri-tjetrit.
Por kthimi i afërsisë nuk është i pamundur – kërkon përpjekje, por mund të arrihet përmes gjesteve të vogla e të qëndrueshme të vëmendjes, bisedave dhe dëgjimit me mirëkuptim.
“Marrëdhëniet më të qëndrueshme nuk janë ato pa probleme, por ato në të cilat partnerët e dinë se nuk janë vetëm në emocionet e tyre. Kur ka afërsi emocionale, marrëdhënia jo vetëm që bëhet më e qëndrueshme ndaj sfidave, por edhe më thellësisht e përmbushur – një hapësirë në të cilën të dy mund të ndihen të parë, të dëgjuar dhe të lidhur me të vërtetë”. përfundon Gardenswartz.
