Zyrtarë të kompanisë amerikane, Bliss Munitions Equipment (Bliss), së bashku me përfaqësues të organizatës private, Kosova Arsenal Group (KAG) kanë zhvilluar një takim me përfaqësues të Ambasadës amerikane në Kosovë.
Takimi u zhvillua përpara fillimit të ndërtimit të fabrikës së prodhimit të municioneve në Kosovë, që do të mbështetet plotësisht nga linjat e prodhimit të municioneve MIL-SPEC të Bliss të prodhuara në Amerikë.
KAG do të ndërtohet sivjet me objektin e saj prodhues në qytetin e Pejës, në tokën e blerë në fillim të vitit 2024.
Me qëllimin që të zbus mungesën mbarëbotërore të municioneve MIL-SPEC 7.62x51mm dhe 12.7x99mm, KAG zgjodhi Bliss Munitions Equipment si partnerin e saj të makinerive dhe pajisjeve të prodhimit.
“E specializuar në zgjidhjet me shërbim të plotë për prodhimin e municioneve të kalibrit të vogël dhe të mesëm MIL-SPEC, Bliss veçohet nga konkurrentët globalë, duke qenë se SHBA vendos standardin në zgjidhjet e pacenuara të mbrojtjes. Globalisht, Bliss është ofruesi kryesor i shërbimit të plotë të zgjidhjeve efikase, efektive dhe afatgjata në prodhimin e municioneve. Duke përdorur ekspertizën e saj prej dekadash të industrisë së mbrojtjes, Bliss do të angazhohet në mbështetjen e plotë të KAG në vitet e ardhshme”.
“Duke e lidhur atë me burimet e nevojshme për të gjitha materialet e jashtme për prodhimin, dhe duke mbikëqyrur zbatimin, Bliss do të përgatisë organizatën private për dekada të suksesit të ardhshëm.I planifikuar për të vazhduar rritjen deri në fund të vitit 2028, KAG thekson se do të forcojë pavarësinë e prodhimit të municioneve brenda Kosovës, duke reduktuar nevojën e vendit për t’u varur nga forcat e jashtme të mbrojtjes, pas pavarësisë së saj të njohur ndërkombëtarisht në vitin 2008”, thuhet në një njoftim të kompanisë amerikane.
Për themeluesit e KAG, ky projekt shihet si një hap i rëndësishëm drejt pavarësisë strategjike të Kosovës, kësisoj duke marrë parasysh sfidat e sigurisë që kanë ndikuar në vend që nga lufta e Kosovës dhe tensionet e vazhdueshme që kanë vazhduar të ndikojnë aktualisht në vend.
