Një studim mbarëkombëtar i realizuar nga Instituti Karolinska në Stokholm ka zbuluar një lidhje të fortë dy drejtimesh midis çrregullimeve premenstruale (PMD) dhe depresionit perinatal (PND).
Hulumtimi, i publikuar në revistën shkencore PLOS Medicine, tregon se ky korrelacion mund të përmirësojë menaxhimin klinik të pacienteve, duke i dhënë më shumë rëndësi parandalimit dhe trajtimit të këtyre kushteve shëndetësore, shkruan CNN.
Studimi analizoi të dhënat e 1.8 milionë shtatzënive midis viteve 2001 dhe 2018, duke përdorur një qasje rast kontrolli për të vlerësuar rrezikun e zhvillimit të depresionit perinatal te gratë me çrregullime premenstruale dhe anasjelltas.
Gjetjet treguan se gratë me histori të PMD-së kishin një rrezik pesëfish më të lartë për të zhvilluar PND, ndërsa ato me diagnozë të PND-së kishin një rrezik 1.81 herë më të lartë për të përjetuar PMD në vitet pasuese.
Rezultatet ishin më të theksuara te gratë pa histori të mëparshme të çrregullimeve psikiatrike, duke nxjerrë në pah ndikimin e luhatjeve hormonale në të dyja gjendjet.
Një krahasim midis motrave përforcoi gjetjet, duke sugjeruar faktorë të përbashkët gjenetikë dhe mjedisorë që ndikojnë në të dyja çrregullimet.
Autorët theksojnë se këto zbulime nënvizojnë nevojën për një qasje të integruar në diagnostikimin dhe trajtimin e këtyre gjendjeve për të përmirësuar kujdesin ndaj grave që vuajnë nga PMD dhe PND.
