Vendet bosh të punës të krijuara në Drejtorinë e Përgjithshme të Shërbimit të Provës dhe mbingarkesa në punë kanë bërë që PS të kërkojë ndryshime në ligj.
Në Komisionin e Sigurisë është prezantuar projektligj i propozuar nga deputeti i Partisë Socialiste, Klevis Xhoxhi ku parashikohet që marrëdhënia e punës në Shërbimin e Provës të rregullohet sipas Kodit të Punës, duke dalë jashtë sistemit të nëpunësit civil.
“Me qëllim rritjen e performancës, rritjen e efikasitetit, cilësisë në përmbushjen e detyrave funksionale si edhe kontroll të vazhdueshëm të Drejtorisë së Përgjithshme të Shërbimit të Provës ka propozuar ndryshimin e legjislacionit që rregullon marrëdhëniet e punës me nënpunësit" tha Xhoxhi.
Një gjë e tillë është kundërshtuar nga deputete të PD-së, të cilët e quajnë këtë propozim një mekanizëm për të kontrolluar administratën politikisht duke u hequr statusin e nënpunësit civil.
Gjithashtu, në ndryshimet e kërkuara në parlament kërkohet niveli i pagave të punonjësve të Drejtorisë së Shërbimit të Provës të përcaktohen me vendim të Këshillit të Ministrave.
Sa i përket shpenzimeve financiare, në projektligj theksohet se pagat e punonjësve duhet të jenë në përputhje me buxhetin që shteti ka vendosur për këtë institucion dhe nuk mund të tejkalohet.
