Luftime të ashpra me agresorin rus/ OKB ndihmon Ukrainën, edhe një shtet ia kthen shpinën Putinit

Agjencia për Migracion e Kombeve të Bashkuara tha të premten se rreth 6.5 milionë njerëz janë zhvendosur brenda Ukrainës, derisa 3.2 milionë të tjerë tashmë janë larguar nga vendi.

Kjo do të thotë se rreth një e katërta e 44 milionë njerëzve të Ukrainës janë detyruar të largohen nga shtëpitë e tyre.

Vlerësimet nga Organizata Ndërkombëtare për Migracionin thonë se Ukraina mund të arrijë në vetëm pak javë nivelin e zhvendosjes së popullatës që kishte ndodhur si pasojë e luftës shkatërruese në Siri, ku rreth 13 milionë njerëz ish zhvendosur nga shtëpitë e tyre si brenda ashtu edhe jashtë vendit.

Përballë një tentative për të rrethuar kryeqytetin ukrainas, forcat ruse në të dy anët e lumit Dnipro - që ndan qytetin nga veriu në jug - janë ndalur, sipas Oleksandr Hruzevych, zëvendës shefi i stafit.

“Nga sot, armiku është ndalur në një distancë prej gati 70 kilometrash (rreth 43 milje) nga bregu i djathtë i qytetit, gjë që e bën të pamundur kryerjen e zjarrit, përveç goditjes me raketa. Në bregun e majtë, përparimi [gjithashtu] është ndalur. Armiku në mënyrë cinike po gjuan objektet tona të infrastrukturës. [Por] mënyrat kryesore të sulmit janë të bllokuara", tha ai të premten, shkruan CNN, përcjell "Bota sot".

Forcat ruse kishin braktisur veprimet sulmuese rreth Brovary në verilindje të Kievit dhe Boryspil në juglindje, tha Hruzevych. Pas krijimit të dy linjave për të mbrojtur kryeqytetin, Hruzevych tha se ushtria e Ukrainës tani "po punonte për forcimin e një linje të tretë, të largët të mbrojtjes".

Duke adresuar kërcënimin e paraqitur nga raketat e lundrimit, gjenerali i brigadës tha se një sistem i mbrojtjes ajrore ishte ende në funksion rreth Kievit, por pranoi se raketat e kapura mbi qytet ende përbënin një kërcënim. Një person u vra në një incident të tillë të premten në mëngjes në rrethin veriperëndimor të Podilskyi, tha më herët këshilli i qytetit. 

Për lajmin e plotë klikoni KËTU.

Shtetet e Bashkuara kanë paralajmëruar Izraelin se duhet të zbatojë sanksionet ndërkombëtare të vendosura ndaj oligarkëve rusë, disa prej të cilëve tashmë kanë shtetësi të dyfishtë ruso-izraelite. Izraeli ka thënë se do të respektojë sanksionet ndërkombëtare kundër Rusisë dhe po përpiqet të adresojë këtë çështje, duke vazhduar të mirëpresë imigrimin e hebrenjve të pasur rusë. Nga Jeruzalemi raporton korrespodentja Linda Gradstein. 

Mediat izraelite i kanë ndjekur me vëmendje lëvizjet e avionit privat të oligarkut ruso-izraelit Roman Abramoviç, i cili është në listën e sanksioneve ndërkombëtare. 

Zoti Abramoviç dhe oligarkët e tjerë kanë shtetësi të dyfishtë ruso-izraelite, kështu që qeveria izraelite nuk mund të pengojë hyrjen e tyre në Izrael, ose të konfiskojë pasuritë e tyre. 

Por qeveria ka formuar një grup pune ku marrin pjesë disa agjenci ligjzbatuese, për të studiuar se si mund të zbatohen sanksionet për këta oligarkë.

Për të lexuar lajmin e plotë klikoni KËTU.

Moska dhe Kievi janë "në gjysmë të rrugës" për të rënë dakord për çështjen e ç’militarizimit të Ukrainës dhe pikëpamjet e tyre janë më të lidhura me neutralitetin e Ukrainës dhe heqjen dorë nga bashkimi me NATO-n, thotë negociatori rus Vladimir Medinsky, shkruan BBC, transmeton "Bota sot".

Agjencia ruse e lajmeve Interfax citon Medinsky të ketë thënë se ekipet negociuese kanë diskutuar garancitë e sigurisë nëse Ukraina nuk përpiqet më të bashkohet me aleancën ushtarake perëndimore.

Presidenti Vladimir Putin i tha dje presidentit turk Rexhep Tajip Erdogan se cilat ishin kërkesat e sakta të Rusisë për një marrëveshje paqeje me Ukrainën.

Kryesorja midis tyre është pranimi nga Ukraina se ajo duhet të jetë neutrale dhe nuk duhet të aplikojë për t'u bashkuar me NATO-n. Këtë e ka pranuar tashmë edhe presidenti i Ukrainës, Volodymyr Zelensky.

Ka edhe kërkesa të tjera në këtë kategori, të cilat më së shumti duket se janë elementë fytyre për palën ruse. Ukraina do të duhej t'i nënshtrohej një procesi çarmatimi për të siguruar që ajo të mos ishte një kërcënim për Rusinë. Do të duhej të kishte mbrojtje për gjuhën ruse në Ukrainë.

Rusia po "përdor pa dallim fuqinë e zjarrit" pasi nuk arriti të përmbushë objektivat e saj në Ukrainë, paralajmëroi shefi i inteligjencës së mbrojtjes britanike.

Gjenerali Sir Jim Hockenhull tha se përdorimi "i pamatur dhe pa dallim" i fuqisë së zjarrit nga forcat ruse do të çonte në mënyrë të pashmangshme në më shumë viktima civile dhe një krizë humanitare përkeqësuese.

"Kremlini deri më tani ka dështuar në arritjen e objektivave të tij fillestarë. Ai është befasuar nga përmasat dhe egërsia e rezistencës ukrainase dhe është mashtruar nga problemet e krijuara nga vetë ai,"tha ai në një deklaratë, shkruan Sky News, përcjell "Bota sot".

"Operacionet ruse kanë ndryshuar. Rusia tani po ndjek një strategji të gërryerjes. Kjo do të përfshijë përdorimin e pamatur dhe pa dallim të fuqisë së zjarrit."

Ai paralajmëroi se strategjia do të rezultojë në rritje të viktimave civile, një ndërprerje të infrastrukturës ukrainase dhe do të intensifikojë krizën humanitare.

Në të njëjtën kohë, Sir Jim tha se presidenti Vladimir Putin po forconte kontrollin e tij mbi mediat vendase ruse në një përpjekje për të maskuar problemet me të cilat përballet fushata e tij.

Ai tha: "Kremlini po përpiqet të kontrollojë narrativën, të fshehë problemet operacionale dhe të fshehë numrin e lartë të viktimave ruse nga populli rus".

Ministri i Jashtëm i Rusisë, Sergej Lavrov, ka thënë të premten se Rusia do të sulmojë cdo dërgesë armësh që hynë në Ukrainë, raportojnë mediat ruse.

"Ne e kemi bërë shumë të qartë se çdo ngarkesë që do të hyjë në territorin e Ukrainës, të cilën ne do ta konsiderojmë [se po bartë] armë, do të bëhet një objektiv legjitim,” raportohet të ketë thënë Lavrov.

Një numër vendesh të NATO-s kanë premtuar ndihmë ushtarake për Ukrainën, duke filluar nga dronët deri te raketat antitank.

Presidenti ukrainas Zelensky tha se ka folur me shefen e Komisionit të BE-së, Ursula von der Leyen dhe ai pret përparim të shpejtë në aplikimin e Ukrainës për anëtarësim të shpejtë në BE.

Zelensky deklaroi se von der Leyen "premtoi se do të bënte gjithçka që ishte e mundur për të shpejtuar anëtarësimin e Ukrainës në BE".

"Ne do të bëhemi një anëtar i plotë i BE-së," thotë ai.

"Proceset burokratike që normalisht zgjasin vite do të përshpejtohen dhe do të shkurtohen me muaj dhe javë."

Teatri i bombarduar nga forcat ruse në Mariupol.

Presidenti i Ukrainës, Volodymyr Zelensky tha se është duke vazhduar shpëtimi i njerëzve nga rrënojat e teatrit të bombarduar në Mariupol nga forcat ruse. Ai tha se deri më tani janë gjetur 130 të mbijetuar.

Në një adresim në internet, Zelensky tha se bombardimet nga forcat ruse vazhduan të pengonin autoritetet që të krijonin korridore efektive humanitare në Mariupol.

"Më shumë se 130 njerëz janë shpëtuar. Por qindra banorë të Mariupolit janë ende nën rrënoja," tha Zelenski në një adresim në profilin e tij në rrjetin social Facebook.

Ai premtoi gjithashtu se operacionet e shpëtimit në Mariupol do të vazhdojnë pavarësisht granatimeve.

Sirenat e sulmit ajror ranë gjatë gjithë natës në qytetin e Dnipros, megjithëse nuk pati raportime për ndonjë sulm në zonë.

Raportime të ngjashme erdhën nga Zaporizhzhia në jug, ku po shkojnë qindra refugjatë nga sulmet në Mariupol, shkruan BBC, transmeton "Bota sot".

Qendrat janë duke u ngritur në magazina, ambiente zyrash, si dhe spitale, për të përballuar refugjatët.

Ndërkohë, raportet e paverifikuara nga brenda Mariupol thonë se rreth 130 njerëz janë shpëtuar nga nën rrënojat e teatrit për të cilin Ukraina thotë se u sulmua nga një sulm ajror rus, edhe pse ishte shënuar qartë se kishte fëmijë të strehuar brenda.

Me radhët e gjata dhe radhët e njerëzve që përpiqen të largohen nga qyteti i rrethuar, civilëve u duhet të lundrojnë nëpër të paktën një duzinë postblloqe ruse për të ikur.

Mendohet se ka ende më shumë se 300,000 civilë të bllokuar brenda Mariupolit, me pjesën më të madhe të qytetit në gërmadha. Fotot e paverifikuara po qarkullojnë në mediat sociale lokale duke treguar imazhe që supozohet se janë automjete të blinduara ruse brenda kufijve të qytetit.

Të premten, më 18 mars, në një paraqitje të rrallë publike, presidenti i Rusisë Vladimir Putin u shfaq në një skenë para dhjetëra-mijëra rusëve për të festuar tetëvjetorin e aneksimit të Krimesë nga Ukraina.

Në ngjarjen që u zhvillua në stadiumin e qytetit të Moskës, Putin lavdëroi aksionin ushtarak rus që po zhvillohet për pushtimin e Ukrainës.

“Krah për krah, ata ndihmojnë dhe mbështesin njëri-tjetrin”, tha Putin para masës.

"Ne nuk kemi pasur unitet si ky për një kohë të gjatë", shtoi Putin derisa dëgjoheshin brohoritjet e turmës.

Në fjalimin e tij, Putin po ashtu i premtoi masës së mbledhur se të gjitha qëllimet e Kremlinit do të arrihen.

"Ne e dimë se çfarë duhet të bëjmë, si ta bëjmë dhe me çfarë kostoje. Dhe ne do t'i realizojmë absolutisht të gjitha planet tona", tha Putin.

Përpara fjalimit të presidentit Putin, grupet muzikore luajtën këngë patriotike sovjetike për identitetin kombëtar dhe folësit e tjerë lavdëruan Putinin se po luftonte "nazizmin" në Ukrainë, një pretendim i hedhur poshtë kategorikisht nga liderët anembanë globit.

Disa të pranishëm, duke përfshirë prezantuesit e ngjarjes, mbanin bluza apo xhaketa me shkronjën "Z" - një simbol që po shihet vazhdimisht i shënuar në tanket dhe automjetet ushtarake ruse në Ukrainë. Këtë simbol po e përdorin kryesisht rusët që mbështetësin luftë.

Putin foli në skenë para dhjetëra-mijëra rusëve që valëvitnin flamurin shtetëror të Rusisë.

Tubimi u mbajt për të festuar përvjetorin e tetë të aneksimit të gadishullit të Krimesë në Detin e Zi, ngjarje kjo që ndodhi më 18 mars të vitit 2014.

Pas fillimit të fjalimit të presidentit rus, Televizioni Shtetëror i Rusisë papritmas ndërpreu fjalimin e tij.

Putin sapo kishte filluar të fliste dhe ishte në mes të fjalisë kur transmetimi i drejtpërdrejtë nga stadiumi Luzhniki papritmas kaloi në imazhe të regjistruara të fjalimeve të vjetra dhe shfaqje të koncerteve.

Zëdhënësi i Kremlinit Dmitry Peskov tha se një problem në server ishte shkaktar i gabimit, raporton agjencia e lajmeve Interfax.

Pak kohë më vonë, fjalimi u shfaq i plotë në kanalin televiziv Rossiya 24.

Rusia filloi pushtimin e Ukrainës me 24 shkurt. Shumica e vendeve të botës kanë kundërshtuar pushtimin rus të Ukrainës dhe Rusisë i janë vendosur sanksione të ashpra ekonomike e politike.