Kina është “në anën e duhur të historisë” sa i përket luftës në Ukrainë
Ministri i Jashtëm kinez, Wang Yi, tha të dielën se “koha do ta dëshmojë se pozicioni i Kinës është në anën e duhur të historisë” sa i përket luftës në Ukrainë.
“Kina do të vazhdojë të bëjë gjykime të pavarura të bazuara në meritat e çështjes dhe me një qëndrim objektiv dhe të drejtë. Ne kurrë nuk do të pranojmë asnjë presion të jashtëm dhe gjithashtu do të kundërshtojmë çdo akuzë dhe dyshim të pabazuar kundër Kinës”, tha Wang Yi për gazetarët, sipas një deklarate të Ministrisë së Punëve të Jashtme.
Wang tha se “zgjidhja afatgjatë qëndron në braktisjen e mentalitetit të Luftës së Ftohtë, duke u përmbajtur nga përfshirja në konfrontim grupor dhe të formohet me të vërtetë një arkitekturë e sigurisë rajonale, e cila duhet të jetë e balancuar, efektive dhe e qëndrueshme. Vetëm në këtë mënyrë mund të arrihet stabilitet afatgjatë në kontinentin evropian".
Komentet e kryediplomatit kinez vijnë pasi të premten presidenti amerikan, Joe Biden, bisedoi me liderin kinez, Xi Jinping, ku e paralajmëroi Kinën që të mos e ndihmojë Rusinë në luftën e saj në Ukrainë.
Ka pasur raportime se Rusia i ka kërkuar Kinës ndihmë ushtarake për luftën në Ukrainë.
Pekini nuk e ka dënuar në mënyrë eksplicite pushtimin rus të Ukrainës.
Rusia ka nisur pushtimin e paprovokuar të Ukrainës më 24 shkurt. Perëndimi është kundërpërgjigjur duke vendosur sanksione të ashpra ekonomike ndaj Moskës.
Ngjarjet kryesore deri më tani në ditën e 25-të të pushtimit rus të Ukrainës
Lexues të nderuar, nëse tani jeni kyçur në blogun tonë lidhur me luftën në Ukrainë, këto janë ngjarjet kryesore që kanë ndodhur deri më tani në ditën e 25-të të pushtimit rus të Ukrainës.
-Presidenti ukrainas, Volodymyr Zelensky, tha se rrethimi i qytetit të Mariupolit do të mbahet mend për shekuj me radhë, duke thënë se përfshin krime lufte të kryera nga forcat ruse
-Zyrtarët ukrainas thanë se në Mariupol, Rusia ka bombarduar një shkollë ku strehoheshin 400 civilë
-Në orët e para të mëngjesit të 20 marsit, sirena për sulme ajrore janë dëgjuar në Kiev, Sumi, Mikolaiv, Poltava, Harkiv, Çerkasi, Odesa dhe Zaporizhja
-Ushtria ukrainase tha se forcat ruse po rigrupohen dhe po riparojnë pajisjet e dëmtuara në vend se të nisin ofensiva të reja
-Zyrtarët lokalë thanë se janë evakuuar 71 fëmijë nga një jetimore në Sumi
-Inteligjenca britanike tha se Rusia po dështon që të marrë kontrollin e hapësirës ajrore ukrainase, që sipas zyrtarëve britanikë, ka qenë objektivi primar i Rusisë
Luftëtarët paraushtarak të Sirisë thonë se janë të gatshëm të luftojnë për Rusinë
Disa luftëtarë paraushtarak sirianë thonë se janë gati të shkojnë në Ukrainë për të luftuar në mbështetje të aleatit të tyre, Rusisë, por nuk kanë marrë ende udhëzime për të shkuar, thanë dy nga komandantët e tyre.
Nabil Abdallah, një komandant në Forcat e Mbrojtjes Kombëtare paraushtarake (NDF), tha se ishte gati të përdorte ekspertizën në luftimet urbane të fituara gjatë luftës siriane për të ndihmuar Rusinë.
“Sapo të marrim udhëzime nga udhëheqja siriane dhe ruse, ne do të luftojmë këtë luftë të drejtë”, tha Abdallah më 14 mars, katër ditë pasi Presidenti Vladimir Putin dha dritën jeshile për 16,000 vullnetarë nga Lindja e Mesme për t’u vendosur në Ukrainë.
“Ne nuk i frikësohemi kësaj lufte dhe jemi gati për të sapo të vijnë udhëzimet për të shkuar dhe për t’u bashkuar. Ne do t’u tregojmë atyre atë që ata kurrë nuk e kanë parë… Ne do të bëjmë luftëra në rrugë dhe do të zbatojmë taktikat që kemi fituar gjatë betejave tona që mposhtën terroristët në Siri”, shtoi ai.
Siria është aleati më i afërt i Rusisë në Lindjen e Mesme dhe ndërhyrja e Moskës në luftën siriane në vitin 2015 rezultoi vendimtare për të ndihmuar presidentin Bashar al-Assad të mposhtte forcat rebele në pjesën më të madhe të vendit, raporton Reuters.
NDF numëron dhjetëra mijëra anëtarë, një grup potencialisht i madh rekrutësh për Rusinë – nëse lufta në Ukrainë zgjatet.
Zyrtarët ukrainas: Rusia ka sulmuar një shkollë që strehonte 400 persona
Këshilli i qytetit të Mariupolit tha se forcat ruse kanë bombarduar një shkollë ku 400 persona po strehoheshin.
Sulmi u tha se ka ndodhur të shtunën.
Në një postim në Telegram, këshilli i qytetit tha se ndërtesa e shkollës është shkatërruar dhe se banorët janë nën rrënoja. Sipas zyrtarëve, gra, fëmijë dhe të moshuar kanë qenë duke u strehuar në këtë shkollë.
Ende nuk ka njoftime për viktimat e mundshme nga ky sulm.
Për shkak të vështirësive në komunikim me qytetin e rrethuar të Mariupolit, ky lajm nuk ka mundur të konfirmohet në mënyrë të pavarur.
Inteligjenca britanike: Rusia do të shtojë sulmet e saj në zonat urbane
Inteligjenca britanike në të dhënat e saj të fundit ka bërë me dije se Rusia ka mundësi që të vazhdojë dhe të përdorë fuqi të rënda zjarri në sulmet e saj në zonat urbane “pasi duket të kufizojë humbjet e veta tashmë të konsiderueshme”.
Ministria e mbrojtjes së Britanisë së Madhe, përmes një postimi në Twitter ka bërë me dije se kjo do të jetë një kosto e madhe me viktima të tjera civile.
Ndër të tjera autoritetet britanike bëjnë me dije se Rusia ka shtuar bombardimet e saj pa dallim ndaj zonave urbane civile gjatë javës së kaluar, pasi ajo rrethoi qytetet e Ukrainës Lindore, por luftoi për të bërë përparim në kapjen e tyre.
Latest Defence Intelligence update on the situation in Ukraine - 20 March 2022
Analiza e Institutit për Studime të Luftës për pushtimin rus të Ukrainës
Rusia ka bërë vetëm përparim të kufizuar në pushtimin e saj të Ukrainës gjatë ofensivës fillestare, tha Instituti për Studime të Luftës. Kjo organizatë me seli në Shtetet e Bashkuara, ka bërë një vlerësim lidhur me suksesin e ofensivës fillestare ruse.
Këto janë disa nga gjetjet kryesore:
Po krijohen kushtet që lufta në pjesën më të madhe të Ukrainës të kthehet në një bllokadë që mund të zgjasë me javë ose muaj të tërë
Sa më shumë të zgjasë kjo bllokadë, aq më vdekjeprurës mund të bëhet
Grupet e vogla të trupave ruse janë të fokusuara në luftime të lokalizuara sesa në nisjen e operacioneve në shkallë të gjerë
Nëse bie Mariupoli nën kontrollin e rusëve, ka pak gjasa që Rusia të ketë më shumë trupa për të zhvilluar një fushatë më të gjerë për shkak të shkallës së dëmit të shkaktuar nga luftëtarët ukrainas
Forcat ruse me gjasë do ta marrin kontrollin e Mariupolit ose do ta detyrojnë qytetin që të kapitullojë në javët në vazhdim
Rusët me gjasë i kanë braktisur planet që ta rrethojnë Kievin nga perëndimi apo ta sulmojnë qytetin nga perëndimi në një të ardhme të afërt
Në vend të kësaj, ata me gjasë po dëshirojnë të krijojnë kushte për të vazhduar bombardimet me artileri dhe raketa në Kiev, duke tentuar që ta godasin qendrën e qytetit
Mbështetja e vazhdueshme për Kievin nga shtetet perëndimore do të jetë jetike
Australia njofton për ndihmë shtesë ushtarake dhe humanitare për Ukrainën
Kryeministri i Australisë, Scott Morrison, më 20 mars bëri të ditur për ndihmën shtesë ushtarake humanitare dhe ushtarake që shteti i tij do t’i japë Ukrainës, teksa njoftoi se do të vendosë ndalesë të menjëhershme në eksportet ruse të aluminit dhe mineraleve të aluminit.
“Është e qartë se nevoja e Ukrainës për ndihmë ushtarake mbetet urgjente dhe do të vazhdojë”, tha zyra e Morrison përmes një deklarate për media.
Ndihma ushtarake: Paketa përfshin 15.3 milionë dollarë amerikanë në ndihmë të mbrojtjes ushtarake për Forcat e Armatosura ukrainase, duke e sjellë në 66.3 milionë dollarë ndihmën ushtarake të ofruar nga Australia.
Morrison tha se ndihma do të përfshijë municion dhe pancirë.
Ndihma humanitare: Qeveria australiane tha se do të dhurojë 21.8 milionë dollarë amerikanë ndihmë humanitare që do të përqendrohet në “mbrojtjen e grave, fëmijëve, të moshuarve dhe personave me aftësi të kufizuara”.
Britania: Rusia po dështon që të marrë kontrollin e hapësirës ajrore ukrainase
Rusia po dështon që të marrë kontrollin e hapësirës ajrore ukrainase, që është një prej objektivave të saj primare, tha Ministria e Mbrojtjes së Mbretërisë së Bashkuar.
Në përditësimin e fundit të informacioneve të inteligjencës britanike, thuhet se Rusia “ka dështuar të marrë kontrollin e ajrit" dhe kryesisht po mbështetet në armët që lëshohen nga hapësira ruse.
“Marrja e kontrollit të hapësirës ajrore ishte një prej objektivave primar të Rusisë në ditët e para të konfliktit dhe dështimi i tyre i vazhdueshëm për ta arritur këtë ka ngadalësuar ndjeshëm progresin e tyre operacional”, tha Ministria britanike e Mbrojtjes.
Ukrainasit përshkruajnë një pamje të dëshpëruar në Mariupol, rreth 300 mijë njerëz të bllokuar
Çdo person që intervistojmë dhe çdo rrëfim që dëgjojmë përshkruan një situatë të dëshpëruar në Mariupol, i cili është rrethuar plotësisht nga trupat ruse. Rreth 300,000 njerëz janë të bllokuar, pa energji elektrike, ujë të rrjedhshëm apo ngrohje, raporton BBC, përcjell Bota sot.
Mes sulmeve të pamëshirshme ruse, civilët kalojnë shumicën e ditëve të tyre në strehimore dhe bodrume, pasi është shumë e rrezikshme të dalësh jashtë, sipas banorëve që kanë arritur të shpëtojnë. Komunikimi me qytetin është i vështirë, me rrjetin telefonik që thuhet se funksionon vetëm disa orë në ditë.
Nuk duket se është kursyer asnjë vend. Kryetari i bashkisë, Vadym Boichenko, tha në fillim të kësaj jave se mbi 80% e ndërtesave të banimit ishin dëmtuar ose shkatërruar, një e treta e tyre nuk mund të riparohej.
"Nuk ka mbetur asnjë qendër qyteti", tha ai. "Nuk ka asnjë copë tokë në qytet që të mos ketë shenja lufte."
Furnizimet ushqimore dhe mjekësore po mbarojnë, pasi Rusia ka penguar dërgimin e ndihmave humanitare. Zyrtarët e qytetit vlerësojnë se të paktën 2,500 njerëz kanë vdekur në luftën trejavore, megjithëse ata pranojnë se kjo është një nënvlerësim pasi nuk janë në gjendje të numërojnë se kush po vritet.
Disa nga të vdekurit janë lënë në rrugë, pasi është shumë e rrezikshme të shkosh tek ata. Kur mblidhen përfundimisht, shumë përfundojnë të varrosur në varre masive - një tjetër simbol i tmerrit atje.
Zelensky pritet të kujtojë Luftën e Dytë Botërore në fjalimin në parlamentin izraelit
Presidenti ukrainas Volodymyr Zelensky, do të mbajë një video fjalim para anëtarëve të Parlamentit izraelit të dielën.
Izraeli është shfaqur i pavullnetshëm për t'u parë në anën e ngushtë të Ukrainës, derisa përpiqet të mbajë marrëdhëniet e punës me Rusinë dhe të veprojë si ndërmjetës në konflikt, raporton BBC.
Zelensky ka folur tashmë me ligjvënës të tjerë anembanë botës - duke përfshirë Mbretërinë e Bashkuar dhe SHBA - duke kërkuar mbështetje.
Me parlamentin e Izraelit aktualisht në pushim dhe ndërtesën në rinovim, plani është që ai t'u drejtohet anëtarëve në një telefonatë Zoom të siguruar posaçërisht. Fjalimi do të shfaqet njëkohësisht në një ekran të madh në një shesh në Tel Aviv, përcjell Bota sot.
Raportet sugjerojnë se Zelensky do të thirret në hebrenjtë e tij dhe do të krahasojë përpjekjet e vendit të tij për të luftuar kundër pushtimit të Rusisë me Luftën e Dytë Botërore dhe Gjermaninë naziste.
Izraeli është përpjekur të mbetet relativisht neutral në këtë konflikt. Derisa Ministri i Jashtëm Yair Lapid ka dënuar pushtimin rus, kryeministri Naftali Bennett - i cili po përpiqet të veprojë si ndërmjetës - është përmbajtur qartë nga kjo.
