LIVE: Rusia tradhton sërish Ukrainën, paralajmërohen goditje të reja ndaj Putinit

Sipas Agjencisë për refugjatë të Organizatës së Kombeve të Bashkuara (UNHCR, më shumë se 4.1 milionë civilë janë larguar deri më tani nga Ukraina e shkatërruar nga lufta.

Agjencia thekson se të dhënat e fundit tani tregojnë se 4,102,876 ukrainas janë larguar nga vendi që nga muaji i kaluar, ndërkaq gratë dhe fëmijët përbëjnë 90 për qind të atyre që ikën.

"Janë detyruar të ikin për të shpëtuar jetën e tyre. Janë detyruar të braktisin shtëpitë e tyre.

Janë detyruar që të ndahen nga familja. Kjo tragjedi duhet të ndalet", ka thënë UNHCR.

Gati 300 mijë refugjatë që ikën nga lufta në Ukrainë kanë mbërritur në Gjermani, sipas Ministrisë së Brendshme gjermane, shkruan CNN, transmeton Bota sot.

Deri të premten, 294,508 refugjatë ishin regjistruar nga policia gjermane.

Numri aktual i refugjatëve që vijnë mund të jetë dukshëm më i lartë për shkak të mungesës së kontrolleve kufitare midis Polonisë dhe Gjermanisë, tha një zëdhënës i ministrisë së brendshme për CNN.

Shumica e refugjatëve që mbërrijnë në Gjermani janë gra, fëmijë dhe të moshuar, tha zëdhënësi.

Ministri i Jashtëm i Ukrainës Dmytro Kuleba thotë se nuk mund të konfirmojë apo mohojë raportet për përfshirjen e Ukrainës në sulmin në depon e karburantit në Belgorod, pasi ai nuk kishte informacion ushtarak, raporton BBC, transmeton Bota sot.

"Unë jam një civil," u tha ai gazetarëve në Varshavë, sipas AFP.

Ministria e mbrojtjes e Ukrainës gjithashtu ka refuzuar të komentojë, me Reuters duke cituar zëdhënësin Oleksandr Motuzyanyk: “Ukraina aktualisht po kryen një operacion mbrojtës kundër agresionit rus në territorin e Ukrainës, dhe kjo nuk do të thotë se Ukraina është përgjegjëse për çdo katastrofë në territorin e Rusisë".

Guvernatori i rajonit tha se sulmi u krye nga dy helikopterë ukrainas, por Ukraina nuk e ka marrë përgjegjësinë.

Beteja 'të mëdha' kanë shpërthyer në veri dhe lindje të Kievit, ka thënë kryebashkiaku i kryeqytetit ukrainas Vitali Klitschko, raporton Sky News, përcjell Bota sot.

Në një paralajmërim për banorët, Klitschko tha se rreziku i vdekjes në Kiev tani ishte "shumë i lartë" dhe u bëri thirrje civilëve që dëshirojnë të kthehen të marrin "më shumë kohë".

Kjo vjen pasi guvernatori rajonal i Kievit tha më herët se forcat ruse kishin filluar të tërhiqeshin në disa zona përreth kryeqytetit.

Klitschko tha: "Rreziku i vdekjes (në Kiev) është mjaft i lartë dhe kjo është arsyeja pse këshilla ime për këdo që dëshiron të kthehet është të lutemi, të marrë pak më shumë kohë."

Gjatë bisedimeve të paqes në Stamboll këtë javë, negociatorët e Kremlinit premtuan të zvogëlojnë "në mënyrë drastike" operacionet e tyre si në Kiev ashtu edhe në Chernihiv.

Megjithatë, më vonë dolën raporte se forcat ruse po vazhdonin të bombardonin Chernihiv pavarësisht premtimit të tyre.

Kjo erdhi pasi presidenti ukrainas Volodymyr Zelenskyy tha se nuk besonte se trupat ruse po tërhiqeshin vullnetarisht nga Kievi dhe Chernihiv, por në vend të kësaj ishin "të shtyrë prapa" nga rezistenca ukrainase.

Të premten, 1 prill, kanë rinisur negociatat mes Kievit dhe Moskës.

Negociatat po zhvillohen derisa në Mariupol ka ende bllokadë në dërgim të ndihmave humanitare dhe evakuim të civilëve nga qyteti i shkatërruar prej luftës.

“Ne po vazhdojmë bisedimet përmes video-konferencës”, ka thënë shefi negociator i palës ruse, Vladimir Medinsky përmes Telegramit.

“Pozicionet tona për Krimenë dhe Donbasin nuk kanë ndryshuar”, ka thënë ai.

Presidenti rus, Vladimir Putin do të bisedojë të premten përmes telefonit me homologun e tij turk, Recep Tayyip Erdogan, ka thënë Kremlini.

Ky njoftim vjen pasi Stambolli ka qenë të martën nikoqir i bisedimeve për paqe mes Ukrainës dhe Rusisë.

Erdogan ka thënë se Turqia është e gatshme, në parim, të angazhohet si garantuese e sigurisë për Ukrainën, mirëpo detajet e një formati të tillë duhet të diskutohen.

Ukraina ka propozuar miratimin e statusit neutral, që nënkupton mosanëtarësim në aleanca ushtarake, sikurse ajo e NATO-s, apo që të jetë nikoqire e bazave ushtarake – dhe që në kthim shtetet të bëhen garantuese të sigurisë së saj.

Erdogan ka biseduar me presidentin ukrainas, Volodymyr Zelensky përmes telefonit të enjten.

Ankaraja ka thënë se mund të jetë ndërmjetësuese në mes të Rusisë dhe Ukrainës.

Kremlini është kundërpërgjigjur pasi aktori francez Gerard Depardieu akuzoi presidentin rus Vladimir Putin për "eksese të çmendura dhe të papranueshme" në Ukrainë. Depardieu tha se populli rus nuk ishte përgjegjës për sjelljen e presidentit të tyre, shkruan BBC, transmeton Bota sot.

Zëdhënësi i Putinit, Dmitry Peskov, tha se aktori ndoshta nuk e kuptonte plotësisht situatën në Ukrainë dhe ofroi ta shpjegonte atë. Depardieu u largua nga Franca për arsye tatimore dhe mori nënshtetësinë ruse në vitin 2013.

Ai e mori pasaportën ruse nga presidenti Putin personalisht në vendpushimin e Detit të Zi, Soçi. Në atë kohë, aktori dhe presidenti shtrënguan duart dhe u përqafuan me njëri-tjetrin, me Depardieu që e përshkruan Rusinë si "një demokraci të madhe".

Në vitin 2015, Ukraina e ndaloi hyrjen në vend për pesë vjet pasi ai mbështeti aneksimin e Krimesë nga Rusia. Pavarësisht kësaj, aktori denoncoi luftën në Ukrainë menjëherë pasi filloi në shkurt dhe bëri thirrje për negociata.

Kritikat e Depardieu ndaj liderit rus iu drejtuan agjencisë franceze të lajmeve AFP të enjten. "Populli rus nuk është përgjegjës për ekseset e çmendura dhe të papranueshme të liderëve të tyre si Vladimir Putin," tha ai.

Megjithë mbështetjen e saj politike për Rusinë, Kina dëshiron të punojë drejt arritjes së paqes në Ukrainë me evropianët dhe komunitetin botëror, sipas kryeministrit Li Keqiang, raportojnë mediet zvicerane, përcjell "Bota sot".

Në video samitin BE-Kinë me Presidenten e Komisionit BE Ursula von der Leyen dhe Presidentin e Këshillit Charles Michel, kryeministri kinez tha se Kina po promovonte bisedimet e paqes "në mënyrën e saj".

Vendi i tij po punon me BE-në dhe botën dhe dëshiron të "luaj një rol konstruktiv në qetësimin e situatës, përfundimin e armiqësive, parandalimin e një katastrofe të madhe humanitare dhe rivendosjen e paqes së shpejti".

Kina është e përkushtuar ndaj sovranitetit dhe integritetit territorial, normave themelore në marrëdhëniet ndërkombëtare dhe zgjidhjes së konflikteve “përmes dialogut dhe negociatave”, citohet të ketë thënë Li Keqiang nga Ministria e Jashtme kineze./M.L.

Komiteti Ndërkombëtar i Kryqit të Kuq (KNKK) ka filuar misionin e tyre të evakuimit në Mariupol. Një zëdhënës i grupit thotë se do të veprojë në një rol ndërmjetësues neutral për të udhëhequr kolonën nga Mariupol dhe në një qytet tjetër ukrainas, raporton BBC, transmeton Bota sot.

"Ne mbetemi me shpresë, jemi në veprim duke lëvizur drejt Mariupolit, por nuk është ende e qartë se kjo do të ndodhë sot".

Ai vazhdon duke thënë: “Po na mbarojnë mbiemrat për të përshkruar tmerret që kanë pësuar banorët në Mariupol. Situata është e tmerrshme dhe përkeqësohet, dhe tani është një imperativ humanitar që njerëzit të lejohen të largohen dhe furnizimet me ndihma të lejohen".

Kryqi i Kuq thotë se krijimi i një kalimi të sigurt për itinerarin me palët ka qenë "jashtëzakonisht i ndërlikuar duke siguruar që të gjitha detajet të bien dakord dhe të kuptohen mirë nga të gjitha palët, dhe më pas t'u komunikohen zinxhirit komandues dhe banorëve". e Mariupolit, është një sfidë”.

Organizata ndërkombëtare për të drejta të njeriut, Human Rights Watch, i ka bërë thirrje Ukrainës që të hulumtojë secilin krim të supozuar të luftës që mund të kenë kryer trupat e saj, pas raportimeve të paverifikuara se ushtarët ukrainas kanë torturuar trupat e zëna ruse prej kur Moska ka nisur sulmin ndaj fqinjës së saj.

Në disa video të publikuara më 27 mars, duken ato që shihen si forca ukrainase duke abuzuar luftëtarët e zënë rusë, të cilët kanë statusin e të burgosurve të luftës, duke përfshirë edhe të shtëna me armë zjarri ndaj tre ushtarëve në këmbë.

Presidenti ukrainas, Volodymyr Zelenskiy ka thënë të nesërmen se Kievi i ka parë supozimet me “shumë seriozitet” dhe do të bëjë hetime.

Lajmin e plotë mund ta lexoni këtu.