Cila nënë është më e madhe,
se kjo tokë e gjithë ky dhe?
Është Arbënorja që ka lindur
trimin e madh, Ty, Skënderbe!
Cila nënë e ka zemrën
të madhe sa mali?
Është Labemadhja
q’e kish nënë Ismail Qemali.
Cila nënë lindi fëmijë,
siç lind hardhia rrushin...?
Është Nënëmira
që e rriti Gurakuqin.
Cila nënë e ka aromën
më të këndshme se blirin?
Është Nënëlokja përmetare
që na fali poet Naimin.
Cila nënë e ka zemrën
më të fortë se gurin?
Është Fisnikja kosovare
që n’jetë solli Bajram Currin.
Cila nënë është rreze drite,
dhe pa asgjë të zezë?
Është Trimëresha prej Mirdite
që i fali botës Shën Nënën Terezë!
Cila nënë burrneshë fare
meriton të mbajë kurorën?
Është ajo, porsi Shota kosovare,
që pat djalë Ibrahim Rugovën!
Cila nënë me vuajtje e halle
veç me këngë e mbushi dishtën?
Është Zadrimorja një azgane
që i dha kombit Atë Gjergj Fishtën!
