“Kush do të fitojë, unë apo ai”, mund të ketë menduar krejt relaksueshëm Memli Krasniqi përpara se në konventën e fundit të Partisë Demokratike të Kosovës të vihet në votim kandidatura e tij për kryetar të kësaj partie. Partia Demokratike e Kosovës, në një mënyrë ose tjetrën, drejtpërdrejtë ose indirekt, me veprime të menduara apo të pa menduara mirë, mirë ose keq, ndikoi fuqishëm në skenën politike të Kosovës dhe në shtet ndërtim.
Delegatët që votuan nuk e patën vështirë, pasi tërheqja e kandidaturave të tjera të paralajmëruara apo të pritura e thjeshtësoi procesin formal. Kjo bëri që në vend se të duket proces i zgjedhjes, të jetë në fakt një emërim. Gjithsesi kjo duket të jetë bërë për të evituar përplasjet dhe për ta konsoliduar partinë e cila pas udhëtimit për në Hagë të dy liderëve të saj, kishte mbetur, në mënyrë metaforike e thënë, “pa kokë”. Madje kishte mbetur pa dy kokat e saj , shpirtërore edhe politike.
Koka, përkohësisht e “vendosur” për të drejtuar këtë parti deri në kthimin e tyre, një intelektual me “përvojë dhe eksperiencë” nuk e arsyetoi pritshmërinë dhe duket se nuk mjaftoi për të mbyllur hemorragjinë e brendshme as për të rikthyer besimin te elektorati i përçarë apo te ata që e ishin rreshtuar në taborë tjera. Përpos pushtetit, zgjedhjet e fundit rrezikuan t'ja marrin kësaj partie edhe “vlerat e luftës”.
Dikujt mund t'i duket se nuk kishte garë. Dikush mund të mendojë se gjithçka është mbyllur, por në fakt gara e vërtetë duhet të jetë zhvilluar dhe do të vazhdojë edhe pas kësaj konvente, brenda vetë personit të kryetarit të ri të PDK. Do të fitojë Memli apo Hashimi Thaqi brenda tij, apo ndoshta do të fitojë Kadri Veseli? Ndoshta do të fitojë një autoritet tjetër në këtë parti? Zëra publik pohojnë, në disa media se pas emërimit të tij qëndron autoriteti i pakontestueshëm i ish komandantit të UÇK. Ai ishte fuqia edhe e ish kryetarit Thaçi i cili e rivendoste “shpeshherë “me gjoks” baraspeshën sa herë që ajo luhatej në dobi të kundërshtarëve të tij.
Kandidati i fundit, e ndoshta edhe më i rëndësishmi i cili mund të fitojë garën brenda vet kryetarit të ri të PDK është edhe personaliteti ndoshta më me ndikim në jetën e tij e ky është intelektuali dhe veprimtari politik Milazim Krasniqi. Autoritet i pakontestueshëm profesional për shumë gjenerata studentësh, gjithnjë në kuptimin politik të fjalës mund të jetë fituesi i garës në kokën politike të kryetarit të ri.
Nuk është se Memli nuk ka potencial të udhëheqë këtë parti, apo cilëndo parti tjetër edhe pse aty nuk është se është se qendra e vendosjes kanë qenë organet e kësaj partie.. Ai me angazhimin e tij ka dëshmuar se ka energji, kreativitet dhe karakter. Pyetja është a ka arritur ai të mundë autoritetet brenda vetes dhe të formësohet në lider të mirëfilltë apo do të jetë vetëm kopje e zbehtë e ndonjërit nga ata dhe vazhdues i veprës dhe luftërave të tyre.
Pra, ishte padyshim një garë e fortë, për kryetarin e ri të PDK, dhe cilado që të jetë zgjedhja, apo qoftë ajo edhe një koktej autoritetesh politike në kokën e kryetarit të ri,, nuk do të jetë e lehtë udhëheqja e një partie si PDK pa e reformuar plotësisht me “dorën e tij” dhe sipas vizionit të tij.
Përderisa LDK po e zëvendësonte dikur, liderin e saj historik me një të ri, pas vdekjes së ish presidentit Rugova, në Partinë Demokratike të Kosovës pas largimit të ish kryetarit të saj nga kreu i partisë për të marrë kreun e shtetit, nuk u arrit të ndërtohet figura e udhëheqësit të ri pasi rrinte pezull ideja e kthimit të mundshëm në parti, të z.Thaçi pas përfundimit të mandatit. As reformat e filluara nga z.Veseli nuk arritën të përmbyllen dhe të sjellin kualitet të ri dhe të mbyllin divergjencat.
Me shkuarjen në Hagë të dy liderëve, vakant nuk mbeti vetëm pozita e kryetarit por mbetën shumë dilema bazike nëse do të vazhdohet me historinë apo do të ofrohet një vizion qytetar e demokratik për të ardhmen. Vlerat e luftës apo vlerat e qytetarit, kujtesa apo shpresa? Frymë e re apo gulçime të së kaluarës?
Sido që të jetë në muajt e parë, sidomos deri në zgjedhjet lokale do të kuptohet kush e fitoi garën për kryetar të PDK, ai apo ata?
Përkundër idesë se nuk pati garë, se nuk pati zgjedhje por emërim, edhe pse duket e brishtë, duhet konsideruar edhe mundësinë që po fillon një epokë e re në PDK. Gara sapo ka nisur dhe shpejtë do të shihet a fitoi ai apo ata! Do të fitojë e kaluara apo e ardhmja? Do të bëhet PDK opozitë serioze apo do të vazhdojë të bjerë...! Kryetari i ri ndoshta edhe mund të jetë urë mes këtyre dy partive ( PDK dhe LDK) që kanë shumë të përbashkëta dhe të cilat vetëm e kaluara i dallon.
